Albon trassa qayıdır
“Formula-1” üzrə dünya çempionatına qatılan komandalardan “Uilyams”ın sürücüsü Aleksander Albon Sinqapurda yenidən sükan arxasına qayıdacaq.
Football-plus.az xəbər verir ki, taylandlı sürücü kor bağırsaq probleminə görə İtaliya mərhələsindən əvvəl əməliyyat olunmuş və onu Nik de Vriz əvəz etmişdi. Gənc pilotun Sinqapurda da çıxışı sual altında idi. Lakin o sağalıb və 2019-cu ildən sonra təqvimə qayıdan Sinqapurda çıxış edə biləcək:
“İtaliya yarışı boyunca mənə dəstək olan hər kəsə təşəkkür edirəm. Sinqapura hazırlığım əvvəlkilərdən fərqli idi, amma özümü hazır hiss edirəm. Təqvimdə fiziki cəhətdən tələbkar olan trasslardan birindəki yarışa hazıram. Cümə günü sükan arxasına keçmək üçün səbirsizlənirəm. Bu gözəl, şəhər tipli trassdı. Taylanddakı evimə də yaxındı. Buna görə də azarkeşləri görmək üçün səbirsizlənirəm”.
“Haas”ın sürücüsü Mik Şumaher də Sinqapur mərhələsini həyəcanla gözləyir. Almaniyalı sürücü karyerasında ilk dəfə bu ölkədə yarışacaq:
“Sinqapur trassı xüsusidi və ora getmək üçün səbirsizlənirəm. Sinqapura çarter reysi ilə bir dəfə getmişdim və təsirlənmişdim. Trassı kəşf etməyi gözləyirəm. Orda rütubət yüksək olduğundan sürücülərə çətindi, ancaq bu da yarışın xüsusiyyətlərindəndi. Görək nə olur. Mümkün qədər çox dövrə vuracağıq. Trassı anlamağa və sıralama turunda yaxşı performans göstərməyə, xal qazanmağa çalışacağam”.
Digər xəbərlər
