“Formula-1” üzrə dünya çempionatının İtaliya mərhələsi Nik de Vrizin debütü ilə əlamətdar oldu.

“Uilyams”ın pilotu Aleks Albon əməliyyat olunduğundan komanda sükanı niderlandlı pilota tapşırdı. O isə debüt yarışında özünü yaxşı göstərdi: finişə 9-cu çatmaqla xal qazandı, eləcə də “günün pilotu” sayıldı.

- Azərkeşlər məhz səni “günün pilotu” seçdi. Özü də “Formula-1”də debüt etdiyin və xal qazandığın mərhələdən sonra. Hansı emosiyaları yaşayırsan?
- Bu əsl imtiyazdı! Belə debütü yalnız arzulamaq olardı! Son 24 saat mənim üçün qarışıq keçdi, yaşananları dərk etməkdə çətinlik çəkirdim. Əsəb gərginliyi var idi, bu üzdən çox pis yatdım, beynimdə müxtəlif fikirlər dolaşırdı. Səhər özümü yemək masasına oturmağa çətinliklə məcbur etdim. Ancaq yarış saatı yaxınlaşdıqca start xəttinə çıxmaq həvəsim artırdı. Belə imkan qazandığıma görə minnətdaram və ona da da sevinirəm ki, komanda ilə birgə bu imkandan doğru yararlandım.

- Belə görünür ki, start ərəfəsində maşınında əyləc tüstülədi, nə problem var idi?
- Düşünürəm ki, maşını start xəttinə aparanda əyləc sistümini bir qədər gücə saldım.

- Startdan finişə qədər trassda gözəl mübarizə apardın. Hər şeyin uğurlu olduğunu hiss edirdinmi?
- Əlbəttə. Bəxtimizin gətirdiyini də anlayıram – bəzi pilotlar cərimələndi, bəziləri yarışdan çəkildi. Ancaq bütün bu imkanlardan tam yararlanmaq və xal qazanmağa çalışmaq vacib idi. Heç kim bu nəticəni əlimizdən almayacaq, mən yalnız qürur duyuram.

- Təbii ki, sükan arxasında oturmağa tam hazır deyildin, Albonu əvəzləməli oldun. Bu mənada çətinlik çəkmədin?
- Bəxtim onda gətirdi ki, Montsa trassında fiziki yüklənmə yüksək həddə deyil. Etiraf etməyə hazıram ki, fiziki hazırlığım yetərincə yaxşı deyil. Simulyatorda işləyirəm, dözümlülük yarışlarına qatılıram, bir sözlə, müxtəlif imkanlardan maksimum yararlanmağa çalışıram. Təhlükəsizlil maşını trassa daxil olanda bir qədər rahatlaşdım və həmin an əlimin keyidiyini hiss etdim. Əlimi tərpədə bilmirdim. Ancaq tədricən bərpa olunuram.
- Razılaş ki, ən yaxşı məşq yarışlarda iştirakdı.
- Tam doğrudu.

- Ehtimal var ki, Sinqapur mərhələsində də “Uilyams”ın maşınına oturasan? Aleksin əməliyyatdan sonrakı bərpa dövrü nə qədər davam edəcək? Axı Sinqapur mərhələsi daha çətindi...
- Xatırlatdığınıza görə sağ olun, ancaq mən tibbi məsələlərdə mütəxəssis deyiləm. İndi sadəcə, Montsada xal qazandığıma görə çox şadam və bu anın həzzini yaşamaq istəyirəm.

- Karyeranın davamı ilə bağlı hansısa danışıqlar gedirmi?
- Yox. Bütün bunlar məndən asılı deyil. Aydındı ki, komandanın heyəti ilə bağlı qərarlara heç bir təsirim yoxdu. Ancaq bir daha təkrar edirəm? əlimə düşən imkandan yararlandığıma görə sevinirəm. İş elə gətirdi ki, atam da Monakoda idi, kimdənsə xahiş edərək maşın götürmüş və Montsaya gəlmişdi. Yarış günü, səhər saatlarında görüşsək də, danışmadıq, ona görə ki, ikimiz də ağlaya bilərdik. Sadəcə, qucaqlaşdıq, yarış ərəfəsində isə start meydançasına gəldi. Yaxşı ki atam bu gün yanımda idi. Əlbəttə, ailəm uzun illər ərzində “Formula-1”də debüt etməyim üçün əlindən gələni əsirgəməyib və artıq bu baş verdi.