Millətlər Liqasında Slovakiya və Qazaxıstan ilə üz-üzə gələcək milli komandanın heyəti açıqlanıb.

Baş məşqçi Canni de Byazi 26 futbolçuya dəvət göndərib: qapıçılar - Şahruddin Məhəmmədəliyev (Qarabağ), Emil Balayev (Səbail), Səlahət Ağayev (Qəbələ); müdafiəçilər - Bədavi Hüseynov, Bəhlul Mustafazadə, Toral Bayramov, Abbas Hüseynov, Elvin Cəfərquliyev (hamısı "Qarabağ"), Qismət Alıyev (Zirə), Cəlal Hüseynov (Şamaxı), Amin Seydiyev (Sabah), Höccət Haqverdi (“Traktor”, İran), Anton Krivotsyuk (“Visla”, Plosk/Polşa); yarımmüdafiəçilər - Riçard Almeyda, Filip Ozobiç (hər ikisi "Qarabağ"), Aleksey İsayev, Elvin Camalov, Anatoli Nuriyev (hamısı "Sabah"), Eddi İsrafilov, Emin Mahmudov (hər ikisi "Neftçi"), Ozan Can Kökçü (“Eyndhoven”, Niderland); hücumçular - Ramil Şeydayev, Musa Qurbanlı (hər ikisi "Qarabağ"), Renat Dadaşov (“Qrasshopper”, İsveçrə), Mahir Emreli (“Dinamo”, Zaqreb/Xorvatiya), Rüstəm Əhmədzadə (Zirə).

Qeyd edək ki, sentyabrın 22-də Trnavada Slovakiyanın qonağı olacaq yığma 3 gün sonra Bakıda Qazaxıstanla münasibətləri aydınlaşdıracaq.

Milliyə dəvət olunanların, demək olar ki, hamısı hazırda komandalarının heyətində özünü yaxşı tərəfdən göstərənlərdi. Görünür, italiyalı məşqçi son iki oyunda yaxşı nəticə qazanmaq niyyətindədi. Bu səbəbdən də yuxarıda adı çəkilən futbolçulara dəvət göndərib. Lakin siyahıda yer almayan bir neçə ad var ki, onların yoxluğu səs-küyə səbəb oldu. Söhbət Qara Qarayev, Rəhim Sadıxov və Rövlan Muradovdan gedir. Bu yazıda adı çəkilənlərin yığmaya çağrılmamasının səbəblərindən bəhs edəcəyik.

Başlayaq Qara Qarayevdən. Əslində yarımmüdafiəçi “Qarabağ”ın əsas futbolçularındandı. Maksim Medvedev zədələnədən sonra 30 yaşlı futbolçu kapitan sarğısını da daşıyır. Bu mövsüm də özünü yaxşı tərəfdən göstərir. Bəs, De Byazinin ona istəməməsinin səbəbi nədi? Burda iki məqam var. Birincisi, De Byazi hücum futbolu oynayan komanda formalaşdırmaq istəyir. Gəlin, yarımmüdafiə və hücumçu xəttində yer alanlara nəzər yetirək. Hamısı daha çox əks-hücumlarda önə çıxan və sürətli futbolçulardı. Qara isə daha çox qurucu yox, dağıdıcı oyun nümayiş etdirir. Elvin Camalov, Eddi İsrafilov və Riçard Almeyda “Qarabağ”ın futbolçususna nisbətdə daha yaradıcıdı. Düşünmək olar ki, italiyalı mütəxəssis hər iki görüşdə yuxarıda qeyd olunan 3 futbolçudan birinə əsas heyətdə şans verəcək. Məhz bu səbəbdən də Qaranın ehtiyatda qalmaması üçün italiyalı bu dəfə ona dəvət göndərməyib.

Bəlkə De Byazi Qaranın “qələmini qırıb”? Yaxın keçmişə qayıdaq. Martın 29-da millimiz Maltada Latviya ilə üz-üzə gəldi. Oyun rəqibin 1:0 hesablı qələbəsi ilə yekunlaşdı. 30-cu dəqiqədə Qara Qarayev birbaşa qırmızı vərəqə ilə meydanı tərk etdi. Bundan sonra yarımmüdafiəçi yığmanın heyətində az şans qazanmağa başladı. Söhbət Millətlər Liqasındakı oyunlardan gedir. “Qarabağ”ın üzvü 4 matçda cəmi 50 dəqiqə meydanda oldu. Deyilənə görə, bu da Ağdam təmsilçisinin oyunçusuna xoş gəlməyib. Buna etiraz etdiyi üçün De Byazini ona son 2 görüşdə şans vermək istəməyib. Məhz bu səbəbdən də Qara yığmaya dəvət olunmayıb.

Yuxarıda qeyd etdik ki, italiyalı hücum futbolu nümayiş etdirən komanda formalaşdırmaq istəyir. Anatoli Nuriyev, Aleksey İsayev, Filip Ozobiç və Emin Mahmudov olan kollektivdə Rəhim Sadıxov onlardan az da olsa, zəif görünür. Baxmayaraq ki, yarımmüdafiəçi bu mövsüm “Zirə”də özünü yaxşı tərəfdən göstərir. Əlbəttə, ab-havanı hiss etməsi üçün pleymeykeri yığmaya dəvət etmək olardı. Lakin Ozan Can Kökçünün Niderlandın ikinci liqasında özünü yaxşı tərəfdən göstərməsi Rəhimin millidən kənarda qalmasına səbəb oldu. Türk əsilli futbolçu ilk dəfə yığmaya dəvət olunub. Düzdü, vinger 21 yaşadək futbolçulardan ibarət yığmada 17 oyunda 2 qol vurub. Bu mövsüm də “Eyndhoven”də özünü sübut edir. O, 7 görüşdə 4 qol vurub. Bu göstəricilərə malik futbolçunun yığmadan kənarda qalması, təbii ki, doğru olmazdı.

Rövlan Muradov mövsümə fırtına kimi başlasa da, sonradan oyununda eniş yaşandı. Əslində Millətlər Liqasınında mübarizə indi başlasaydı, bəlkə də De Byazi ona dəvət göndərərdi. Lakin italiyalı mütəxəssis son 2 görüşdə qələbə qazanmaq istəyir. Millinin çalışdırıcısı eksperiment aparmaq istəmədiyi üçün Rövlanı siyahıdan kənarda saxlayıb. Açıq danışsaq, heyətdə yer alan 26 futbolçu “Qəbələ”nin üzvündən fərdi keyfiyyətlərinə görə güclüdü. Bu da yarımmüdafiəçinin yığmadan kənarda qalmasına təsir edən əsas amildi.

İLKİN SULTANLI