“Tualet təmizləyir, yerləri silirdik” - Çağlar Söyüncü
Türkiyəni Avropada uğurla təmsil edən futbolçulardan olan Çağlar Söyüncü İngiltərənin məşhur ''Tayms'' nəşrinə müsahibə verib.
Football-plus.az xəbər verir ki, Türkiyənin 1-ci liqa təmsilçisi ''Altınordu''da ulduzu parladıqdan sonra 2 il ''Frayburq''da top qovan və 2018-dən bu yana ''Lester''in şərəfini qoruyan 26 yaşlı mərkəz müdafiəçisi həyatı və karyerası ilə bağlı diqqətçəkən açıqlamalar verib:
''Futbol üzündən mən evi ilk dəfə 11 yaşımda tərk etməli olmuşdum. Çox çətin idi və bəzən gecələr ağladığımı xatırlayıram. Yaxınlıqda qalan komanda yoldaşlarım məşqdən sonra evə gedirdi. Biz isə tanımadığımız yerlərdə qalmalı olurduq. Tualet təmizləyir, təmizlik işləri görür və yerləri silirdik. Bu cür şəkildə həyatı öyrənmiş olduq. Türkiyədə çox sevilirəm və ölkənin dörd bir yanında insanlar məni dəstəkləyir. Bunun da səbəbi odu ki, Avropaya ''Altınordu''dan yollanmışam. Məsələn, ''Beşiktaş''dan yollansaydım, məni ''Beşiktaş''lılardan başqa heç kim sevməzdi. Eyni sözlər ''Qalatasaray''a da aiddi. Amma 1-ci liqa təmsilçisində yetişdiyim üçün hamı məni bağrına basır. ''Taksim Meydanı''nda rahat gəzə bilmirəm. İnsanların çox böyük marağı ilə üzləşirəm. Məncə, İngiltərədə futbol daha çox bir iş kimi qəbul olunur. Türkiyədə isə futbola yanaşma tərzi fərqlidi. İnsanlar futbola fanatik dərəcədə bağlıdı. Bu məqam bəzən oyunçuların üzərində təzyiq yaradırsa, bəzən əksinə, böyük enerji verir. Təbii ki, premyer-liqa kimi turnirdə oynamağımla qürur duyuram. Dediyim odu ki, Türkiyədə azarkeşlik mədəniyyəti dünyanın bir çox ölkəsindən fərqlənir. Orda az qala hər il desibel rekordu qırılır və oyun vaxtı tribunada kiminsə sakitcə yerində oturduğunu görmək mümkün deyil. Gündə beş dəfə namaz qılmağa çalışıram və hər Ramazan ayında oruc tuturam. Bu, uşaqlıqdan bəri davam edir və artıq vərdiş halını alıb. Həyatımın bir parçasına çevrilib. Ramazan ayının ilk günləri bir az çətin keçsə də, Allah bizə yardım edir. Haqqımda gəzən transfer şaiyələri haqda isə danışmaq istəmirəm. Mən ''Lester''in oyunçusuyam və bu komandanın uğuru üçün meydanda potensialımın yüz faizini sərgiləməyə çalışıram. ''Lester''də əsil ailə ab-havası hökm sürür və mənim üçün bu kollektiv böyük önəm kəsb edir. Çünki bura gələrkən karyeramda yeni səhifə açdım. ''Lester'' mənə tam yeni səviyyəyə yüksəlməyə imkan verdi''.
Digər xəbərlər
