"Araz Naxçıvan" Türkiyədə turnirə qatılacaq
"Araz Naxçıvan" Türkiyədə keçiriləcək beynəlxalq turnirinə qatılacaq.
Football-plus.az xəbər verir ki, yarış Uluslararası Yetenek Avcıları Futbol Akademiyasının (UYAFA) təşkilatçılığı ilə 2023-cü il mayın 25-31-i aralığında Ərzurumda təşkil olunacaq. 24 iştirakçı arasında "Araz Naxçıvan"ın U-13 komandası da yer alacaq.
Daha detallı məlumat almaq "Araz Naxçıvan"ın İdarə Heyətinin sədr müavini Sakit Rzayevlə əlaqə saxladıq:
"UYAFA-nın əsas məqsədi Türkiyədə istedadlı uşaqları futbola cəlb etmək və onları daha iddialı klublara və liqalara daşımaqdı. Türkiyənin, demək olar ki, hər şəhərində filialları var. Həmçinin Almaniya, Rumıniya, Fransa, Niderland, Azərbaycan, Afrika ölkələri və digər dövlətlərlə əməkdaşlıq edir. Azərbaycanda UYAFA-nın nümayəndəsi və təşkilat rəhbəri mənəm. Gələn ildən UYAFA-nın təşkilatçılığıyla ilk dəfə Ərzurumda fərqli ölkələri təmsil edən klubların U-13 komandaları arasında beynəlxalq turnir keçiriləcək. Bunu ənənəyə çevirəcəyik. Gələcəkdə bu turnirin Azərbaycanda təşkili haqda təklif də vermişəm. Ərzurumda keçiriləcək turnirdə başqa klublarımızın U-13 komandaları da iştirak edəcək. Hazırda 2 klubla danışıqlar aparılır. Adlarını açıqlamayacam. Turnirdə iştirak edəcək komandaların qarşılanması, yerləşdirilməsi, zəruri ehtiyaclarının və xərclərinin hamısını UYAFA üzərinə götürür. Hətta iştirakçı komandaların hər birinə formalar da paylanacaq. UYAFA gələcəkdə Naxçıvan Muxtar Respublikası və başqa bölgələrimizdə yarışlar keçirməklə istedadlı futbolçularımızın üzə çıxarılmasına çalışacaq".
ABDULLA İSMAYILOĞLU
Digər xəbərlər
