“Neftçi” AFFA-dan xəbər gözləyir
Azər Əliyev “Neftçi”yə gələndə xoşagəlməz hadisələrlə üzləşəcəyini, yəqin ki, ağlının ucundan belə keçirməyib.
28 yaşlı futbolçu azərbaycanlı ola-ola, premyer-liqada əcnəbi statusu ilə oynayır. Komandanın heyətində müdafiə və yarımmüdafiənin sağında, bir neçə dəqiqəlik olsa belə, hücumçu kimi də çıxış etdi. İndi isə arxa xətdə sol cinahda çıxış edir. Laurentsiu Regekampf da ondan razıdı. Deyir ki, Azərin bu mövqedə belə oyun nümayiş etdirəcəyini gözləmirdim. Bir sözlə, hazırda Əliyevə yeni tapıntı gözü ilə baxırlar. Lakin vaxtilə bu futbolçu “Yenisey”, “Saxalin”, “Samara”, “Ufa” və “Tambov”da top qovub. Həmin dövrlərdə Rusiyanın iddialı klubları onu heyətinə qatmaq istəyirdi.
İndiki dönəmə qayıtsaq, futbolçunun işlərinin düzəldiyini söyləyə bilərik. Yaxın günlərdə onun sənəd məsələsi həll olunacaq. Redaksiyamıza daxil olan məlumata görə, Azər Əliyev premyer-liqada əcnəbi yox, yerli statusunda çıxış edəcək. Belə ki, federasiya rəsmiləri futbolçunun problemini həll edib. Azər milli komandada da oynamağa razılıq verib. Və böyük ehtimalla növbəti seçmə mərhələdə yığmaya dəvət olunan oyunçular arasında yer alacaq. Sözsüz, yığmanın yeni baş məşqçisi onun oyununu bəyənsə, milliyə də çağrılacaq. İstənilən halda Azərin “milliləşdirilməsi” ölkə futbola xeyir verə bilər.
Görəsən, məlumat nə qədər səhihdi? “Neftçi”nin sol cinah müdafiəçisinin problemi həll olunur? Məsələ ilə bağlı flaqmanın mövqeyini də öyrəndik. Klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevin fikri belə oldu:
“Onsuz da biz klub olaraq açıqlamışdıq ki, Azər Əliyevin milli pasport alması ilə bağlı hansısa problem qalmayıb. Bir aydan çox müddətdi ki, hər şeyi AFFA-ya təhvil vermişik. İndi qərarı gözləyirik ki, nə zaman Azərə pasport veriləcək. Əslində indiyə qədər də verilə bilərdi. Amma biz də səbəblərini bilmirik ki, nə üçün yubanır? Yəqin hansısa proseslər bitməlidi ki, pasport verilsin. İndi gözləyirik. Ola bilər, bu gün və ya sabah verilsin. Yenə deyirəm, biz onsuz da rəsmən açıqlamışdıq ki, bu məsələ həllini tapmaq üzrədi”.
İLKİN SULTANLI
Digər xəbərlər
