Bir neçə gün öncə Aleksey Baqanın gedişindən sonra boş qalan “Sumqayıt”ın baş məşqçi postuna 1 yerli, 2 əcnəbi namizəd olduğunu xəbər vermişdik.

Onu da bildirmişdik ki, yerlilərdən Samir Abasov namizədlər arasındadı. Sadəcə, 44 yaşlı çalışdırıcı hələ ki, klub rəhbərliyi ilə danışıqlarda razılığa gələ bilmir. Tərəflər əsasən müqavilənin müddətində ortaq məxrəcə gəlməkdə çətinlik çəkir. Mütəxəssis 3 illik sözləşmə istəyir, “Sumqayıt” isə daha az müddətli anlaşma təklif edir. Əcnəbilərə gəlincə, onlardan biri Yuri Maksimovdu. Onu “Keşlə”dən tanıyırıq. Bu klubla ölkə kubokunun qalibi olmuşdu. İkincisi də tanış simadı. O isə vaxtilə “İnter”də çalışmış Kaxaber Tsxadadzedi. Gürcüstanlının son klubu Tiflis “Dinamo”su olub. Hazırda hər iki məşqçi ilə danışıqlar aparılır.

Etibarlı mənbədən əldə etdiyimiz məlumata görə, prioritet Samir Abasovdu. Onunla razılığa gəlinəcəyi halda əcnəbi mütəxəssislərdən imtina olunacaq. Böyük ehtimalla həftənin sonuna qədər “Sumqayıt”ın yeni baş məşqçisi müəyyənləşəcək.

RƏŞAD