Misli premyer-liqasında 5-ci tura start verilib.

“Kəpəz” “Qarabağ”ı qəbul edib. Qonaqlar minimal hesablı qələbə qazanıb. Oyundan sonra meydan sahiblərinin məşqçisi Xaliq Mərdanov mətbuat konfransında iştirak edib. O, fikirlərini bölüşüb və jurnalistlərin suallarını cavablandırıb:

- Tural Rzayevin qırmızı vərəqə aldığı epizoda münasibətiniz necədir?
- Epizod bizdən uzaqda idi, görə bilmədim. Yəqin ki, hakimlər düzgün qərar verib. Qarşımızda nəinki Azərbaycanın, Avropanın güclü komandalarından biri var idi.

- Bu gün "Qarabağ" əsas heyəti ilə meydana çıxmışdı və "Kəpəz" yaxşı mübarizə apardı. Komanda ilk dörd turda niyə belə oynamırdı?
- Əvvəlki baş məşqçi ilə bağlı heç nə demək istəmirəm. Onlar da bizim kolleqalardı. İşlərində uğurlar arzulayıram. Amma biz komandaya gələndə ruh yüksəkliyi aşağı dərəcədə idi. Azarkeşlər, media tərəfindən təzyiq var idi. İstədik ki, ruh düşkünlüyünü aradan qaldıraq. Üç gün ərzində nəyə Nail olduğumuzu oyun göstərdi. Məşq prosesində səhvlər var idi. Üç gün ərzində bunları aradan qaldırmağa çalışdıq. Əlimizdən gələni bu qədər edə bildik.

- İki legioneri ehtiyatda saxladız, gənclərə şans verdiz...
- Gəncədə gənc, perspektivli futbolçular çoxdu. Sadəcə olaraq onları üzə çıxarmaq lazımdı. İstədik ki, onlara da şans verək, özlərini doğrultsunlar. Legionerlərlə gənclər arasında böyük fərq görmürəm.

- Beş oyun beş məğlubiyyət. Komandanın potensialı vəziyyəti düzəltməyə imkan verəcək?
- Rəhbərliyin məşqçi dəyişikliyi edəcəyini bilmirəm. Biz nə qədər buradayıqsa, əlimizdən gələni edəcəyik ki, durumu düzəldək. Gözəl oyun nümayiş etdirmək istəyirik. Gözəl oyun olanda nəticə də olacaq. Amma bu, gələcəyin işidi.