Bosniya və Herseqovinanın paytaxtı Sarayevoda cüdo üzrə yeniyetmələr arasında dünya çempionatı davam edir.

Football-plus.az xəbər verir ki, bu gün mundialda fərdi yarışlara yekun vurulacaq. Dördüncü gündə Azərbaycanın daha 2 təmsilçisi tatami üzərinə çıxacaq.

Oğlanların 90 kiloqramdan yuxarı çəki dərəcəsində yer alan Ramazan Əhmədov mübarizəyə 1/16 finaldan qoşulacaq. Onun bu mərhələdəki rəqibi Zan Kostanjsek (Sloveniya) olacaq.

Qızların 70 kiloqramdan yuxarı çəkisindəki Nigar Süleymanova isə eyni mərhələdə Sevinç Turakulova (Özbəkistan) ilə münasibətləri aydınlaşdıracaq.

Təsnifat görüşlər Bakı vaxtı ilə saat 12.00-da başlayacaq.

Qeyd edək ki, ilk üç gündə tatamiyə çıxan 11 Azərbaycan təmsilçisindən üçü çıxışını medalla başa vurub. Şahin Oruczadə (55 kq) gümüş, Nizami İmranov (60 kq) və Aydan Vəliyeva (48 kq) bürünc mükafata sahib çıxıblar. Cüdoçular sabah komanda yarışında iştirak edəcəklər.