Plzendə pley-offa yaraşmayan idarəçilik - AÇIQLAMA
Çempionlar Liqasında mübarizəni dayandıran “Qarabağ” artıq Avropa Liqasında yarışacaq.
Cavab görüşündə “Viktoriya” ağdamlılara 2:1 hesabıyla qalib gəldi. Plzendəki oyunu Portiqaliyadan olan hakimlər briqadası idarə edirdi. Artur Diaşın 90 dəqiqə ərzində ciddi səhvi diqqəti çəkmədi. Matçı müəyyən qədər aşağı tempdə saxlayan referi qayda pozuntuları zamanı dərhal cərimə zəribəsi təyin edirdi. Ümumilikdə 6 sarı vərəqə üçün əlini cibinə atdı. Bunlardan 5-i “Viktoriya”nın futbolçusuna, 1-i isə “Qarabağ”ın ehtiyat qapıçısı Luka Quqeşaşviliyə göstərildi.
Hakimliyi dəyərləndirməsi üçün Əfqan Həmzəyevə müraciət etdik. Təcrübəli referinin detallı təhlilinə keçid alaq: “Oyunu idarə etməyin 4 yönü var: çox yaxşı, yaxşı, normal və bacarığından aşağı. Bunlar hakimlər üçün standart qiymətləndirmədi. “Viktoriya” – “Qarabağ” matçının hakimliyini normal qiymətləndirərdim. Görüşü nə çox yüksək, nə də pis idarə etdilər. Orta səviyyədə idi. Ən müsbət məqam o idi ki, hakim təzyiqdən çəkinmədi. Hər fitdə azarkeş basqısı var idi. Lakin yenə də qərarları qorxmadan verirdi. Həm yerli, həm də qonaq komandanın lehinə və əleyhinə nə görürdüsə, fitini səsləndirirdi. Problem o idi ki, standartlıq yox idi. Bu o deməkdi ki, hakim cərimənin ölçüsünü hesablaya bilmirdi. Elə qayda pozuntuları var idi ki, orda oyunu davam etdirə bilərdi, amma saxlayırdı. Bununla da yerli publikanı qıcıqlandırırdı. Xırda qayda pozuntularını saxlamaya bilərdi. Məsələn, oyunda cərimə olurdu, lakin top “Qarabağ”da idi. Bunu saxlamaya bilərdi. Çünki ətrafda topu “Qarabağ”ın oyunçusundan ala biləcək rəqib yoxdu. Rəqib qaydanı pozsa da, komandanın irəliləmək şansı varsa, burax oynasın. Bütün epizodları geri qaytarırdı. Belə 4-5 epizod oldu. Bu da göstərirdi ki, hakimin qərarlarında standartlıq yoxdu. Yəni o, anı tuta bilmirdi. Yəqin özü üçün müəyyənləşdirmişdi ki, bütün xırda qayda pozuntuları zamanı oyunu saxlayacaq. Bu da həm özünün dincəlməsinə, həm də tempin aşağı düşməsinə hesablanmışdı. Amma fikrimcə, qərarlarının 90 faizində haqlı idi. Bəli, bir neçə epizod var idi ki, “Qarabağ”ın xeyirinə cərimə zəribəsi verməliydi, amma vermədi. Filip Ozobiçə, Kadi Borgesə qarşı qayda pozularkən oyunu saxlamadı. Nəticədə rəqib təhlükəli əks-hücumlara çıxdı. Bütün bunlarla yanaşı, oyunun nəticəsinə təsir edən səhvi olmadı. Hakimlər briqadası bunun üçün çox çalışdı və öhdəsindən gəldi. Laysmanlar oyundankənar vəziyyətlərin hamısında haqlı qərar verdilər. Baş hakimə çox kömək etdilər. Hətta son anlarda Kadinin vurduğu cərimə zərbəsi var idi, top qapının üstündən keçdi. Orda da Şeydayevə qarşı qayda pozuldu. Bu epizodda cərimə zərbəsini baş hakim yox, laysman təyin etdi. Buna da stadionda böyük etiraz oldu. Oyunun hakim-inspektoru olsaydım, baş hakimi 8,3, köməkçilərini isə 8,5 balla qiymətləndirərdim. Ehtiyat hakimin də qiyməti 8,4 olardı. Çünki texniki zonada da bir problem yox idi. Bir-iki dəfə problem oldu, onu da yoluna qoydu. Hətta baş hakimi çağırdı, yerli komandanın futbolçusuna sarı vərəqə verildi. Qoldan sonra, demək olar, bütün futbolçuların meydana girməsi 4-cü hakimin gözündən yayınmadı. Bu da onun üçün müsbət məqamdı”.
ŞAİR ABDULLA
Digər xəbərlər
