"Futbolçunun başını qarışdırmaq üçün bu cür şayiələr yayılır" - Qurban Qurbanov
"Qarabağ"ın baş məşqçisi Qurban Qurbanov komandanın müdafiəçisi Toral Bayramovun adının Türkiyənin "Qalatasaray" klubu ilə hallanmasına münasibət bildirib.
"Football-plus.az" xəbər verir ki, o, Çexiyaya səfər öncəsi jurnalistlərə açıqlamasında hər hansı təklif almadıqlarını deyib:"Bizdə belə məlumat yoxdu. Sanki futbolçunun başını qarışdırmaq üçün bu cür şayiələr yayılır. Bu da məni narahat edir. Daha çox reklam xarakterli belə iddiaları kimlərin ortaya atdığını bilmirəm. Futbolçumuzun adı birdən-birə belə böyük klubla hallanır. Hamımız buna şad olarıq və sevinərik. Amma ,məncə, hər şeyə ciddi yanaşmaq lazımdı. Ciddi olduqda həm klub, həm də futbolçu düzgün qərar verə bilir və daha doğru düşünməyi bacarır. Belə şayiələr yalnız futbolçunun ziyanınadı. Ona ziyan verirsə, kluba da təsir edir. Ediləcək bir şey yoxdu. Dəfələrlə belə hallar baş verib. Gənc oyunçularla bağlı bu cür xəbərlər çıxdıqda müəyyən müddət öz yaxşı formasından uzaq olurlar".
Türkiyə mətbuatı "Qalatasaray"ın, eyni zamanda digər Super Liqa təmsilçisi "Kayserispor"un və aşağı liqa komandası "Eyüpspor"un Toral Bayramovu istədiyini yazıb.
Digər xəbərlər
