“Montsa”nın baş direktoru Avropa Superliqası ideyasını dəstəkləyir. Bilindiyi kimi ötən ilin aprelində qitənin 12 klubu eyniadlı turnirin təsis olunduğunu bəyan etmişdilər.
Lakin əsasən İngiltərənin 6 klubunun layihədən geri çəkilməsi yeni yarışın reallaşmasını qeyri-mümkün etmişdi. Vaxtilə uzun illər “Milan”da baş direktor vəzifəsini icra edən Qalliani Superliqanı İngiltərə klubları olmadan da yaratmağın mümkünlüyünü deyir:
“İngiltərə premyer-liqasının iştirakçıları A seriyası klubları ilə müqayisədə 4 dəfə çox qazanırlar. “Montsa” teleyayım hüququnun satışından 33 milyon avro alacaq, bunun 3 milyonunu B seriyasına verməliyik. Premyer-liqaya yenicə çıxan klub 160 milyon avro qazanır. Biz “Nottingem Forest” ilə necə rəqabət aparaq? Mən dünya iqtisadiyyatında mövcud olan belə tendensiyanın qarşısını necə alım? Breksit futbolda da mövcud olmalıdı: mən ingilislərsiz Avropa Superliqasının yaradılmasını təklif edirəm”.
