Hakim haqqın yox, meydan sahiblərinin tərəfində idi!
Çempionlar Liqasının 2-ci təsnifat mərhələsinin "Sürix" - "Qarabağ" oyunu dünən gec saatlarda başa çatsa da, təcrübəli referilərdən Elçin Məmmədov “Futbol+” qəzeti üçün idarəçiliklə bağlı önəmli məqamları incələdi.
Bəribaşdan deyək ki, Allard Lindhutun rəhbərlik etdiyi niderlandlı hakimlər briqadası ideal təsir bağışlamadı. Referi hansısa oyunda ümumilikdə 13 sarı vərəqə göstərirsə, deməli, hadisələrin axarına nəzarəti itirib. Məhz Lindhutun əcaib qərarlarının nəticəsi kimi “Qarabağ”ın iki önəmli oyunçusu – Riçard Almeyda ilə Kadi Borges cəzalı duruma düşdü. Təbii ki, bu bizim qənaətimizdi. Bəs Elçin Məmmədov nə deyir? Sözü ona verək: "Qarabağ"ı "Sürix"lə çətin səfər oyununun gözlədiyi əvvəldən məlum idi. 1-ci hissədə oyunda temp və təhlükəli vəziyyətlər olsa da, komandaların sürətli oyun nümayiş etdirdiyini demək olmaz. Hakimdə də işi çox olmadı. Hakimin "Qarabağ"ın qapısına vurulan 2-ci qolu ofsayd kimi qiymətləndirməsi tam doğru qərar idi.
Top ayaqdan çıxan anda rəqib futbolçu sonuncu müdafiəçidən öndə idi. Referi sərt oyuna imkan versə də, Vaci cinahdan sürətlə hücuma keçərkən rəqibin 31 nömrəli futbolçusu Krezyuya kobud oyununa görə göstərdiyi sarı vərəqə, həmçinin Veşoviçin “sarı”sı da haqlı qərar idi. 2-ci hissədə "Qarabağ"ın hesabı bərabərləşdirməsiylə oyunda sürət artdı. Hakim üç dəfə əlehimizə qərar verdi. 57-ci dəqiqədə Vaciyə qarşı aşkar kobudluq olsa da, referi qayda pozuntusunu nəzərə almadı. Künc zərbəsi zamanı Kadiyə göstərilən “sarı” da haqsız idi. Çünki braziliyalı oyunun bərpasını qəsdən gecikdirmirdi, sadəcə, komanda yoldaşlarının rəqib qapısı önündə çoxalmasını gözləyirdi. Maksim Medvedevin əzələsini dartdığı epizodda rəqib futbolçunun bizimkilərdən Yankoviçə zərbə endirməsini hakim görmədi. Ən böyük səhv isə laysmanın idi. Həmin epizodda birbaşa qırmızı vərəqənin olub-olmadığını müəyyənləşdirmək üçün təkrar-təkar baxmaq lazımdı, amma düşünürəm ki, ən azı sarı vərəqə verilməliydi. VAR sistemini tətbiqinin labüdlüyü bir daha özünü göstərdi. Oyunda dayanmaları, həkimlərin meydana çıxdığını nəzərə alsaq, referinin 2-ci hissəyə 7 dəqiqə əlavə etməsi düzgün idi. Əlavə vaxtda referi iki dəfə əlehimizə qərar verdi. Birincisi, Ramil Şeydayevə qarşı kobudluq zamanı rəqib futbolçuya Qurban Qurbanovla mübahisə etdiyinə görə sarı vərəqə verilməliydi, 2-ci dəfə isə Kadinin ayağı tapdalandığına görə yenə rəqib oyunçuya rəsmi xəbərdarlıq olunmadı. Sonda hər şey "Qarabağ"ın istədiyi kimi qurtardı, ağdamlılar mərhələni keçdi. Yekunda Niderlanddan olan hakimlər briqadasının idarəçiliyini əlehimizə verdiyi qərarları qabarmaq şərti ilə kafi qiymətləndirirəm".
ABDULLA İSMAYILOĞLU
