Yeni direktor "Neftçi"dəki hədəfindən danışdı - VİDEO
“Neftçi” Futbol Akademiyasının yeni direktoru Cemal Bülbül klubun televiziya kanalına açıqlama verib.
Football-plus.az xəbər verir ki, türkiyəli mütəxəssis qardaş ölkəyə gəldiyi üçün özünü rahat hiss etdiyini söyləyib:
“Neftçi” ilə iki ay idi danışıq aparırdım. Klub prezidenti Kamran Quliyev və idman direktoru Zaur Əzizova hədəflərimi açıqladım, onlar da bura gəlməyimə vəsilə oldular. Klub prezidenti ilə söhbətimdə də dedim ki, ilk hədəfimiz oyunçuların “Neftçi”yə bağlılığını artırmaq olacaq. Bura mənim üçün ölkə xarici deyil. Öz ölkəmdəki kimiyəm. Yeganə problemim ailəmdən uzaq düşməkdi. Amma onlar da bir ay ərzində gələcəklər”.
Daha sonra Cemal Bülbül "Neftçi"dəki hədəflərini bildirib:
"Klubun səhifəsində gördüyüm bir cümlə çox xoşuma gəlmişdi. Yazılmışdı ki, bizdə əsas məqsəd oyun yox, oyunçu qazanmaqdı. Bu cümlə mənə təsir etdi. Ona görə də ilk hədəfimiz futbolçuların "Neftçi"yə olan bağını möhkəmlətməkdi. Futbol həyatında 10-12 yaş aralığı önəmlidi. Bu yaşda nə futbol öyrəndinsə, o sənin gələcəyini də təmin edir. 17-19 yaş aralığında bunu öyrənmək çox çətin olur".
Qeyd edək ki, "Neftçi" Cemal Bülbüllə 2 illik müqavilə bağlayıb. O, "Neftçi"yə gələnədək "Göztəpə" klubunun Matç və Performans Təhlili və Skautluq Departamentində çalışıb.
Digər xəbərlər
