"Neftçi" azarkeşi geridönüşə inanır
Konfrans Liqasında mübarizəyə start verən “Neftçi” ilk oyunda Cənubi Kipr təmsilçisi “Aris”lə qarşılaşdgı. Təəssüf ki, bakılılar bu görüşdə 0:2 hesabı ilə məğlub oldu.
Görəsən, “Neftçi” azarkeşləri bu oyun haqda nə düşünür? Onlar cavab görüşündə doğma komandalarından nə gözləyir? İlk görüşdəki məğlubiyyətə baxmayaraq, “Neftçi”nin mərhələ keçəcəyinə inamları var? Bu haqda məlumat almaq üçün “Neftçi” azarkeşi Aqil Məmmədquliyevlə əlaqə saxladıq. Onun “Football-plus.az” saytına açıqlaması belə oldu:“Vəziyyət elədi ki... Ümumiyyətlə, mən bir müraciət hazırlayıb “feysbuk” və digər sosial şəbəkələrdə paylaşmaq istəyirdim. Amma belə qismət imiş ki, fikirlərimi sizə bildirim. Hesab etmirəm ki, yeni baş məşqçi bu qədər səhvlərə yol verə bilərdi. Sadəcə, mənə elə gəlir ki, vaxt azlığından uşaqlara 15-20 faiz daha artıq yükləmə olmuşdu deyə, tam istəniləni verə bilmədilər. Heyətidə bundan qat-qat ağır oyunları görən, daha təcrübəli futbolçularımız var. Komandanın baş məşqçisindən tutmuş, klubun rəhbərliyinə qədər hər birinə qarşıdan gələn oyuna çox ciddi köklənməyi və qələbəyə inanmağı tövsiyə edirəm. Bu mərhələni keçmək olar. Düzəldilməyəcək səhvlər olmayıb. Əlbəttə, asan olmayacaq, amma mərhələni keçmək mümkündü. Sadəcə, toparlanmaq lazımdı, toparlanmalıdı. hamının məqsədi bir olmalıdı. Hər kəs “Neftçi” azarkeşinin inandığı kimi komandaya inanmalıdı. Əminəm və inanıram ki, biz bu mərhələni keçə bilərik. Sadəcə, klub rəhbərliyindən tutmuş, inzibatçıya qədər hər birimiz qələbəyə inansaq, bu mümkündü. Çalışacağıq baş məşqçinin bizdən gözləntilərinin daha artığını ortaya qoyaq. Amma baş məşqçi də çalışsın ki, bizim gözləntilərimizi yerinə yetirsin. İlk dəfə bizim qarşımızda çıxacaq. Baş məşqçiyə hələ ki tam bələd deyilik. Amma mənə elə gəlir ki, yola gedə biləcəyik. Bizim üçün əsas olan qələbə qazanmaqdı.
İlk oyuna gəlincə, gözləntilər tam olaraq belə deyildi. Sanki uşaqlarda ağırlıq var idi. Bir az “Aris”in də bəxti gətirmədi. Bir neçə epizodda fərqlənə bilmədilər. Bizim də şansımız gətirmədi. Oyun haqda çox danışmağa, məncə, ehtiyac yoxdu. “Neftçi”yə çox inanıram, güvənirəm. Hər bir “Neftçi” azarkeşi də bu fikirdədi. 0:2 elə də böyük hesab deyil. Klub rəhbərliyinə də demək istəyirəm ki, futbolçulara hər zaman dəstək olmaq lazımdı ki, uşaqlar çıxıb meydanda döyüşsünlər. Son 10-15 ildə dəfələrlə belə halla rastlaşmışıq. Geridönüş etmək şərtdi”.
ŞAİR ABDULLA
Digər xəbərlər
