Yeni mövsümdə “Sumqayıt-2”ni Vüqar Quliyev çalışdıracaq. Vaxtilə “Qarabağ”, “Bakı”, MKT-Araz və yığmanın şərəfini qorumuş müdafiəçi ilə əvəzedici komandanın ikitərəfli oyunundan sonra görüşdük. Onunla söhbətdə həm təyinatına münasibət öyrəndik, həm də gələcək planları ilə tanış olduq.
- Bir neçə il idi “Sumqayıt” Futbol Akademiyasının müxtəlif yaş qruplarında çalışırdım. Rəhbərlikdən əvəzedici komandanı çalışdırmaq təklifi gəlincə, müsbət qarşıladım. İnşallah, həm mənə, həm də kluba uğurlu təyinat olar.
- Bu güz izlədiyim oyunda görünən o oldu ki, heyətdə yeniyetmələr daha çox yer alıb. Əsasən klubun öz yetirmələrinə özünü göstərmək şansı yaratmışdız.
- Bəli, əsas məqsədimiz odu ki, “Sumqayıt-2”də akademiyanın yetirmələri oynasın. Onları inkişaf etdirmək və əsas komandaya göndərmək istəyirik.
- Rəhbərlik qarşınıza hansı məqsədi qoyub? Nəticə qazanmağı, yoxsa futbolçu yetişdirməyi? Adətən, bizim klublarda rəsmilər “nəticə vacib deyil, əsas futbolçu yetişdirmək lazımdı” söyləsələr də, sonda turnir cədvəli önə çəkilir...
- Təyinat rəsmiləşmədən klubun prezidenti Riad Rəfiyevlə görüşümüz oldu. Söhbət zamanı prioritetin nə olduğunu müəyyənləşdirdik. Klub prezidenti “əsas akademiyanın yetirmələrinin inkişafıdı” söylədi ki, bu da məni sevindirdi. Cari nəticəni düşünəsi olsaq, yeniyetmə və gənclərimizi itirəcəyik. İnkişaf mərhələli şəkildə olmalıdı. Adından da görünür ki, bu əvəzedici kollektivdi. Bu komandanın əsas işi A kollektiv üçün ehtiyat qüvvə yetişdirməkdi. Bəli, bu gün kollektivin əsasını öz yetirmələrimiz təşkil edir. Kənardan daha təcrübəli oyunçu dəvət etmək olardı. Ancaq birincisi, bu gün yerli futbolçu qıtlığını yaşayırıq, ikincisi, düşündük ki, kənardan dəvət etdiyimiz futbolçular bizə nə verəcək? Qarşımıza çempionluq və ya mükafatçılar arasına düşmək məqsədi qoyulmayıb. Düzdü, düzgün iş olan yerdə nəticədə olacaq. Ancaq yenə deyirəm, bizim üçün əsas nəticə yox, futbolçularımızın inkişafıdı.
- Yeni mövsüm əvvəlkilərdən fərqli olacaq. Bu dəfə birinci divizionda bölgə təmsilçilərin sayı çox olduğundan sizi çətin səfərlər gözləyir. Özünüz də bilirsiz ki, bölgədə azarkeşlər qonaq komandalara daim psixoloji təsir edirlər, onları basqı altında saxlayırlar. Gənclərin və yeniyetmələrin bu təzyiqin altında çıxa biləcəyini düşünürsüz?
- İnkişaf elə bundan başlayır. Gənclərimiz texniki-taktiki tərəfdən inkişaf etdiyi kimi, psixoloji təzyiqə də öyrəşməlidi. Bölgələrə səfər, minlərlə azarkeşin qarşsında oynamaq onların böyük futbola keçidinin əsas mərhələrindən biri sayılır. Onsuz da bu uşaqlar aşağı yaş qruplarında çıxış edərkən rəqib komandaların futbolçuları ilə hər il üz-üzə gəliblər. Bir-birini yaxşı tanıyırlar, kimin nəyə qadir olduğunu bilirlər. Dolu tribunalar qarşısında oynamağa da öyrəşməklidilər ki, premyer-liqada çıxış edəcəkləri halda özlərini itirməsinlər.
RƏŞAD