Uimbldon turniri arxada qalandan sonra tennis dünyasının diqqəti 29 avqust – 11 sentyabr aralığında keçiriləcək “US Open”ə yönəlib. “Böyülk dəbilqə” turnirlərinin 23 qat qalibi Serena Uilyamsın sabiq məşqçisi Rik Makki belə hesab edir ki, amerikalı tennisçinin elə bu il “US Open”i qazanmaq şansı var: “Serena “US Open”i qazanmaq istəyirsə, özünü tam işə həsr etməli və möhtəşəm forma yığmalıdı. Siz istedadınızı yox, fiziki formanızı itirirsiz. Sonra oynamağa başlayan kimi özünəinam qayıdır. Onun, sadəcə, qələbələrə və məğlubiyyətlərə öyrəşməsi lazımdı. Serena bəlkə də istənilən idman növündə görə biləcəyimiz ən yaxşı qadın idmançıdı. Serena pitbul kimidi, səni tutdusa, buraxmayacaq”.
Xatırladaq ki, Serena Uimbldon turnirinin elə ilk dövrəsində fransalı Armoni Tana uduzmaqla mübarizəni dayandırmışdı.
Bu arada ABŞ Açıq Tennis Turnirinin təşkilatçıları koronavirusa görə peyvənd olunmayan tennisçilərin turnirdə iştirakı ilə bağlı rəsmi bəyanat yayıb: “Böyük dəbiqə” turnirlərinin təşkili ilə bağlı qaydalara uyğun olaraq, reytinqi imkan verən bütün oyunçular avtomatik turnirə buraxılır. Təşkilatçılar tennisçilərdən məcburi peydənd tələb etmir, ancaq ABŞ hökumətinin peyvənd olunmayan vətəndaşların bu ölkəyə girişi ilə bağlı mövqeyinə hörmətlə yanaşır”.
Daha bir maraqlı xəbər odu ki, məşhur məşqçi Vim Fissett Naomi Osaka ilə əməkdaşlığı dayandırdığını elan edib: “2019-dan bəri Naomini çalışdırmaq və onun çempiona çevrildiyini görmək mənim üçün şərəf idi. O, bütöv bir yeni nəsli tennisi sevməyə ruhlandırdı. Bu yolun bir parçası olmaq qeyri-adi idi. Sağ ol, Naomi! Sənə hər şeyin ən yaxşısını arzulayır və səbirsizliklə yeni fəslin başlamasını gözləyirəm”.
Xatırladaq ki, yaponiyalı tennisçi iki dəfə “US Open”in (2018, 2020), iki dəfə isə “Australian Open”in (2019, 2021) qalibi olub, həminin WTA turnirlərində 7 titul qazanıb.