Komanda yoldaşı millidən imtina edən idmançını tənqid etdi - "Mənəvi məsuliyyəti dərk etmir"
Azərbaycanlı qrossmeyster Vasif Durarbəyli Dünya Şahmat Olimpiadasında yığmanın tərkibində yer almaqdan imtina edən Teymur Rəcəbovun qərarına münasibət bildirib.
"Football-plus.az" xəbər verir ki, Durarbəyli özünün sosial şəbəkə hesabında Rəcəbovu sərt tənqid edib:"Komanda yoldaşı ilə problem olmasın deyə uzun müddətdi, bu mövzuda fikir yazmaqdan yayınırdım. Birdən bəs Teymur Rəcəbov fikrini dəyişər və millidə oynayar, amma bu baş vermədi. Adının nə qoyulacağını tezliklə bilərik.
Bu dəfə Azərbaycanın ilk Olimpiya medalı qazanmaq üçün tarixi şansı yaranmışdı. Prinsipcə hələ də itməyib, lakin açıq danışmaq lazımdırsa, Azərbaycanda Rəcəbovu əvəzləyəcək şahmatçı yoxdu və onun getməməsi medal şansını xeyli azaldı.
Bu məqamda xatırlatmaq yerinə düşər ki, Rəcəbovun bu mövqeyə yetməsi üçün dövlət milyonlar xərcləyib. Təbii ki, belə borcu ödəmək mümkünsüzdü. Fəqət, ən azından şəxsi şahmata davam edilən müddətdə yığmada oynamaq şərtdi. Şəxsi turnirlərdə hər kəs sırf öz mənfəəti, yığmada isə ümumi xeyir üçün iştirak edir.
Kimi Məmməd Arazın "Vətən mən oğul desə nə dərdim, mamır olub qayasında bitərdim." kəlamını əyani həyatımızda nümayiş etdirir.
Kimi də Rəcəbov kimi milyonlarla yatırım alır, amma sonsuz mənəvi məsuliyyətinin olduğunu, görünür, dərk etmir. 2019-cu ildə son anda yorğunluğu bəhanə edib, komandanı yarı yolda qoymaq, 2021-ci ildə 8 oyunda mübarizəsiz heç-heçələr, indiki imtina və hələ bildiyim, amma bölüşmədiyim bir çox qeyri-ictimai məlumatlar mənə bunu deməyə əsas verir.
Qısası, məncə, Rəcəbov iki əli qanda olsa belə, özünü bu olimpiadaya yetirməli idi! Etmədiyinə görə də onu qınayıram".
Digər xəbərlər
