2022/23 mövsümündə premyer-liqada bu dəyişiklər olacaq!
Növbəti mövsüm Azərbaycan premyer-liqasında 10 komanda mübarizə aparacaq.
Artıq çempionatın başlayacağı tarix də məlumdu. Belə ki, mövsümə avqustun 5-də start veriləcək. Püşkatma mərasimi isə sabah, saat 15.00-da AFFA-nın inzibati binasında keçiriləcək.
Püşkatma və yeni mövsümdə hansı yeniliklərin olub-olmayacağı ilə bağlı PFL-in Texniki İdman Departamentinin rəisi Elgiz Abbasovla əlaqə saxladıq:
“Tədbirdə öncə 1-ci turun oyunları dəqiqləşəcək. Ondan sonra buna uyğun qalan oyunların püşkü atılacaq. Bu dəfə çempionat 36 turdan ibarət olacaq. Püşkatma mərasiminə klub nümayəndələri və jurnalistlər dəvətlidi. Diqqət etsəz, bu il çempionata əvvəlkilərə nisbətən daha erkən başlayırıq. Eyni zamanda, qış fasiləsinin bir qədər qısaldılması da nəzərdə tutulur. Dünya çempionatının keçiriləcəyi ərəfələr də var. Biz bunu da təhlil etmişik. Premyer-liqada çıxış edən futbolçulardan dünya çempionatında iştirak edən yoxdu. Eyni zamanda, milli komandamız da bu turnirə qatılmayacaq. Buna baxmayaraq, həmin dönəmdə bəzi turlar sıx qrafik üzrə keçirilə bilər".
Daha bir maraqlı məqam premyer-liqada VAR sistemindən istifadə ilə bağlıdı. Elgiz Abbasovu dinləyək:
"Bildiyiniz kimi, AFFA bir müddətdi bu istiqamətdə işlərə start verib. Məndə olan məlumata görə, çalışmalar sürətlə davam edir. Lakin bu məsələ ilə bağlı püşkatma mərasimi zamanı daha ətraflı məlumat veriləcək".
ŞAİR ABDULLA
