Kristian Eriksenin özünə yeni klub tapdığını xəbər vermişdik. Ötən mövsümün ikinci yarısını “Brentford”da keçirən təcrübəli futbolçu “Tottenhem”lilərdə böyük qəzəb oyadıb.

Paytaxt komandasının sabiq oyunçusunun “Mançester Yunayted”lə anlaşması londonluların bəzi azarkeşlərini əsəbiləşdirib. “Goal.com” saytının məlumatına görə, 30 yaşlı yarımmüdafiəçi 2017-ci ildə “Tottenhem”in prezidenti Daniel Leviyə İngiltərədə başqa komandada oynamayacağına dair söz vermişdi. Kristianın bu vədinə xilaf çıxması fanatların qəzəblənməsinə səbəb olub. Bir neçə azarkeş onun vaxtilə “Tottenhem”də geydiyi “23” nömrəli formanı yandırıb. Bəzi tərəfdarlar isə danimarkalı oyunçunu müdafiə ediblər. 

Xatırladaq ki, Eriksen pandemiyaya görə ötən yay keçirilən AÇ-2020-nin qrup mərhələsinin Finlandiya ilə matçında huşunu itirmiş, ürəktutması keçirdiyi məlum olmuşdu. Mikroəməliyyata məruz qalan futbolçunun ürəyinə cihaz yerləşdirildiyinə görə əvvəlki klubu “İnter”də meydana çıxmasına icazə verilmədiyi üçün tərəflər dekabrda müqaviləyə qarşılıqlı razılaşma əsasında xitam vermişdilər. Yanvarın 31-də “Brentford”a keçən futbolçu bir neçə gün əvvəl MY ilə 3 illik müddətə razılığa gəlib. Onun “Tottenhem”də 2013-20-ci illərdə oynadığını da xatırladaq.