Olimpiya çempionunun medalı zibil paketindən çıxdı
ABŞ voleybol yığmasının heyətində Tokio Olimpiadasının qalibi olan Cordin Poulterin qızıl medalı çox təəccüblü şəkildə sahibinə qayıdıb.
Football-plus.az xəbər verir ki, 24 yaşlı voleyboluçu mayın 25-də oğurlanan medalını qaytaranlara 1000 dollar, həmçinin hüquqi müstəvidə izlənməmə vəd etmişdi. Bu tarixçənin finalı qeyri-adi olub. Anahaym şəhərindəki gözəllik salonunun sahibləri medalı zibil paketinin içində tapıb. Onlar dərhal 911 xidmətinə zəng ediblər, polis medalı sahibinə çatdırıb.
Medal mühafizə olunmayan parklama yerində, qapısı bağlanmayan maşından oğurlanmışdı. Medalla yanaşı, Cordinin pasportu və çantası sa yoxa çıxmışdı. 2 saatdan artıq müddətdə maşına nəzarət etməyən voleybolçu dönərkən oğruların qurbanı olduğunu müəyyənləşdirmişdi. Poulter bir qədər diqqətsiz davrandığını etiraf etmişdi. Olimpiya medalı kimi qiymətli əşyanı seyfdə yox, maşında saxlamasına təəccüblənən adamların sualına cavabında isə demişdi ki, mükafatı özündən aralı saxlamaq çətindi:
“İdmançıların ağlasığmaz həyatı var, tez-tez səfərlərdə oluruq. Ölkə xaricində çıxış edir, sonra vətənə dönür, ardından təlim-məşq toplanışına yollanırıq. Bu üzdən medalı özümdə saxlamağa üstünlük verdim. Bunun sayəsində medalı istənilən an dostlarıma və ya yaxınlarıma, ya da sadəcə, görmək istəyən adamlara göstərə bilirdim. Adamlar olimpiya çempionunu görəndə özlərini sanki qələbənin iştirakçısı sayırlar. Sevincini dostlarla bölüşmək çox gözəldi”.
İyunun 7-də voleybolçunun maşınından oğurluq faktı üzrə cinayəti boynuna alan Cordan Fernandes həbs olunmuşdu. Bu şəxsin çox zəngin kriminal bioqrafiyası var. 2020-nin yazında zorakılıqla həyata keçirilən qarətə görə 120 günlüyə həbsə atılmış və 3 il şərti cəza almışdı. Bu ilin yanvarında şərti cəza dövrünün qaydalarını pozduğuna görə daha 60 gün “yatmalı” olub. Bundan başqa, maşın oğurluğunda və narkotiklərin saxlanılmasında sa suçlanır. Və indi də yeni ittiham. Düzdü, iyunun 7-də - həbs anında medal onun üzərində yox idi. Cordan onun harda olduğunu deməkdən də boyun qaçırırdı.
Dərin məyusluq keçirən voleybolçu müsahibəsində izah edirdi ki, olimpiya medalı, sadəcə, rəmzi xarakter daşıyır, heç bir zərgərlik dəyəri yoxdu. Yəni Tokio Olimpiadasının təşkilatçıları medalın əsasını köhnə smartfonlardan hazırladığına görə onu qızıl halına salmaq mümkünsüzdü, kolleksiyaçılara satanda da seriya nömrəsinə görə asanlıqla ələ keçmək olar. Diqqətsiz idmançının köməyinə Mariya Karrilyo ilə Noe Ernandensin (gözəllik salonunun sahibləri) ayıq-sayıqlığı çatdı. Onlar qapıları önündə zibil paketinin ağır olduğunu görəndə istər-istəməz içindəki ilə maraqlanıblar. Belədə oğurlanan medal üzə çıxıb.
Digər xəbərlər
