Kriştiano Ronaldonun bu yay “Mançester Yunayted”dən ayrılmaq ehtimalı getdikcə artır.

Son günlər başverənlər və yayılan xəbərlər belə düşünməyə əsas verir. Əsas odu ki, futbol ulduzu son bir ildə iş yerini ikinci dəfə dəyişməkdə qərarlıdı.

Bugünlərdə 37 yaşlı hücumçunun klub rəhbərliyindən əlverişli təklif gələcəyi halda onu satmağı xahiş etdiyi barədə xəbər yayılmışdı. Ötən ilin avqustunda “Yuventus”dan ayrılan ulduz futbolçu üç il şərəfini qoruduğu turinlilərlə Çempionlar Liqasında 1/4 finaldan uzağa gedə bilməmişdi. Məlum məsələdi ki, bu turnirdə qələbə portuqaliyalının indiyədək 5 dəfə sahib çıxdığı “Qızıl top”u praktiki olaraq qazanması deməkdi. Lakin “Yuventus”un son illər ÇL-də uğursuzluq zolağından çıxa bilməməsi onu bir il əvvəl sabiq klubuna qayıtmağa vadar etmişdi. MY isə ötən mövsüm İtaliya nəhəngi ilə müqayisədə daha zəif nəticə göstərdi: premyer-liqada 6-cı yeri tutdu. İngiltərə mənbələri Ronaldonun peşəkar karyerasının sonu yaxınlaşdığı üçün yenə ÇL-də oynamaq istədiyini vurğulayır. Onun komandası isə Avropa Liqasında çıxış edəcək...

Daha əvvəl Kriştianonun rəhbərliyin sönük transfer fəaliyyətindən narazı olduğu üçün MY-ni tərk etməyi düşündüyü iddia edilmişdi. Lakin indi məsələ daha da konkretləşib: dünya şöhrətli futbolçu AL-i səviyyəsinə və nüfuzuna uyğun turnir saymır! Deməli, nəyin bahasına olur-olsun, ÇL-də iddialı sayılan klublardan birinə keçməyə can atır.

O, yeni mövsümün hazırlıq prosesinə mankunianlarla başlamaq istəmir. Belə baxanda doğru düşünür. Bu ay, ya da avqustda komandasını dəyişəcəksə, MY ilə, özü də fərqli oyun üslubuna üsünlük verən yeni məşqçi Erik ten Haqın başçılığı altında növbəti mövsümə hazırlaşmağın nə mənası var? Fakt budu ki, Kriştiano komandanın ardıcıl 3-cü məşqini buraxıb! “Goal News”un məlumatına görə, rəhbərlik hələ də hücumçunun komanda ilə birlikdə Taylanddakı toplanışa getmək istəyib-istəmədiyini bilmir. Xəbərdə o da qeyd olunur ki, Ronaldo formasını qorumaq üçün Portuqaliya yığmasının Lissabondakı təlim-məşq bazasında məşq edir. Halbuki bazar ertəsi klubun yaydığı məlumatda futbolçunun məşqdən yayınmasının ailə vəziyyəti ilə bağlı olduğu bildirilmişdi...

Son mövsüm “Yunayted”in formasında bütün turnirlərdə 38 oyunda iştirak edən, 24 qol vurub 3 məhsuldar ötürmə edən futbolçunun komandadan bu şəkildə yayınması klubun başbilənlərini narahat etməyə bilməz. Əlbəttə, müasir futbolda getmək istəyən oyunçunu, özü də Ronaldonu məcburən komandada saxlamaq həm çox müşkül, həm də lazımsız məsələdi. MY rəhbərliyi bunu çox yaxşı anlayır. ESPN-nin yaydığı xəbərə görə, klub onu yalnız iki şərtlə sata bilər. Bunun üçün əvvəlcə Kriştianonu İngiltərədən olmayan klub istəməlidi. İkinci şərt isə həmin klubun portuqaliyalıya həftəyə 500 min funt sterlinq qazandıran müqaviləsinin son 12 aylıq xərclərini ödəməyə hazır olmasıyla bağlıdı. Ulduz futbolçu yalnız bu şərtlər əsasında satıla bilər.
Yeri gəlmişkən, “Bild” qəzeti Ronaldonun “Bavariya”ya keçməməsinə səbəb olan amilləri oxucularının diqqətinə çatdırıb. Hücumçunun Münhen klubuna getməməsinin iki ciddi səbəbi var. Bunlardan biri onu yüksək maaşla təmin etməyin qaçılmaz olmasıdı. Digər səbəb isə Kriştianonun oyun üslubu ilə bağlıdı: onun “Bavariya”nın baş məşqisi Yulian Naqelsmannın pressinq sisteminə uyğunlaşması, demək olar ki, qeyri-mümkündü. Səbəbkarın adı doğma klubu “Sportinq”, “Roma” və hətta “Yuventus”la da birgə hallanır. Lakin onun bu klubların sıralarında görünmək ehtimalı azdı. Bu arada Ronaldonun “Barselona”ya transfer oluna biləcəyi haqda iddia ortaya atılıb. “As” qəzetinin yaydığı xəbərdə onun agenti Jorje Mendeşin “Barselona”nın prezidenti Xuan Laporta ilə görüşdüyü bildirilib. Deyilənə görə, tərəflər futbolçunun gələcəyi ilə bağlı müzakirə aparıblar. İspaniya qəzeti kataloniyalıların “Bavariya”dan Robert Levandovskini transfer edə bilməyəcəyi halda Ronaldonu sıralarına qatmağa çalışacaqlarını ehtimal edir. Amma populyar idman nəşri bir maraqlı məqamı da vurğulayır. Laportanın Mendeşlə görüşməsi “Bavariya” üçün təzyiq vasitəsi rolunu oynaya bilər. Belə ki, Levandovskiyə görə “Barselona”nın artıq üç təklifini geri çevirən Almaniya nəhəngi polşalı hücumçusunun əvəzində daha çox, deyilənə görə, bonuslarla birlikdə 60 milyon avro qazanmaq istəyir. Bu tələbi həddən artıq sayan İspaniya klubu Robertin transferindən vaz keçərsə, münhenlilər inadla “Barsa”ya can atan futbolçu ilə bir ildən sonra heç nə qazanmadan vidalaşacaqlar.

İndiki məqamda Ronaldo üçün “Çelsi” variantı daha real görünür. London klubunu çalışdıran Tomas Tuxel onun çoxdankı pərəstişkarıdı. Alman mütəxəssis hələ ki, mümkün transferi klubun yeni həmsahibi Todd Boeli ilə müzakirə etməyib. Boeli isə baş məşqçinin razılığı olmadan heç bir transferi həyata keçirməyəcəyini bildirib. Deyilənə görə, Kriştiano ÇL-dəki qollarının sayını artırmaq üçün “Çelsi”yə qoşulmağa razıdı. Hətta məvacibinin əhəmiyyətli dərəcədə azaldılmasına da hazırdı. Amma bu da var ki, MY oyunçusunu premyer-liqadakı əsas rəqiblərindən birinə satmaq istəmir. Satmağa məcbur olacağı halda paytaxt klubundan nə qədər təzminat istəyəcəyi, həmçinin səbəbkarın maaş və bonuslarla bağlı məsələsi də londonluları düşündürən suallardı.

Reaksiya:

Xuan Laporta, “Barselona”nın prezidenti: “Doğrudu, Mendeşlə birgə nahar etmişəm. Mən heç nəyi istisna etməyəcəyəm, bu, bizim maraqlarımıza uyğun gəlmir. Mendeşin nə dediyini dəqiqləşdirməyəcəyəm. Onunla həmişə ünsiyyət qurmaqda maraqlıyam. Mendeş mənə transfer bazarındakı mövcud vəziyyətdən danışıb”.