"Biz bunu bacaracağıq" - David Qustavo
"Araz Naxıvan"ın futzalçısı David Qustavo UEFA Çempionlar Liqasının əsas mərhələsinin püşkünü dəyərləndirib.
"Football-plus.az" xəbər verir ki, o, federasiyanın rəsmi saytına açıqlamasında bu barədə danışıb. Braziliyalı oyunçu bildirib ki, Avropanın ən nüfuzlu klub turnirində zəif rəqib olmur:
“Açığı, indi istirahətdə olduğumuza görə, kimlərlə müqavilə imzalandığını, heyətə kimlərin cəlb edildiyini dəqiq bilmirəm. Amma rəhbrəliyin komandanı gücləndirmək istədiyini və hədəflərin böyüdüyünü eşitmişəm. Aydın məsələdi ki, Çempionlar Liqasında zəif rəqib olmur. Çünki orda ölkəsinin çempionu yarışır. İşimiz asan olmayacaq, əksinə çətin olacağını qeyd etməliyəm. Gərgin mübarizə gözləyir və biz də qarşıya qoyulan tapşırığa çatmaq üçün sona qədər döyüşəcəyik. Rəqiblərimizin bizim yeni oyunçulardan xəbərsiz olduqlarına inanıram. Məncə, yeni mövsümdə fərqli, daha güclü “Araz Naxçıvan” görəcəksiniz. Bütün işlər, dəyişikliklər məqsədə nail olmaq üçün edilir. Rəqiblərimizə gəldikdə, “Mostar” doğma meydan amilindən də istifadə edəcək. Biz bunu ötən ilk “Uraqan”ın timsalında gördük. Bu baxımdan onlarla oyun çox çətin olacaq. Digər iki rəqibimizin kimliyi hələ avqustun sonunda müəyyənləşəcək. Serbiya və Gürcüstan çempionu öz qruplarında favorit olsalar da, sürprizlərdən də qaçmaq mümkün deyil. Bu cür turnirlər zamanı əsas özünün hazır olmağındır. Qarşıda vaxtımız çoxdur. Güclü futzalçılar cəlb etməklə bərabər, yaxşı hazırlıq keçəcəyik. Çünki bunun üçün əla şəraitimiz var. Komandama inanıram. Biz bunu bacaracağıq”.
Qeyd edək ki, "Araz-Naxçıvan" B yolunun 5-ci qrupunda mübarizə aparacaq. “Araz Naxçıvan”ın rəqibləri “Mostar” (Bosniya və Herseqovina), həmçinin ilkin mərhələnin D qrupunun (İsveçrə “Mineva”sı, Serbiya “Loznika-Qrad 2018”i, Norveç “Vesteralen”i, San-Marino “Folqore”si) və F qrupunun (Gürcüstan “Georgians”ı, Almaniya “Ştutqart”ı, İsveç “Orebro”su, Türkiyə “İstanbul Şişli”si) qalibləri olacaq. Qrup oyunları Bosniya və Herseqovinada keçiriləcək.
Digər xəbərlər
