“Sabah” rəhbərliyi əvəzedicilərin fəaliyyətini dayandırdı
"Sabah"ın əvəzedicilərdən ibarət komandası fəaliyyətini dayandırıb.
Klub rəhbərliyi “ikincilər”in növbəti mövsüm 1-ci divizionda iştirakını məqbul saymayıb. Etibarlı mənbədən əldə etdiyimiz xəbərin doğru olub-olmadığını aydınlaşdırmaq üçün klubun Müşahidə Şurasının üzvü və idman direktoru İqor Ponomaryovla danışdıq: "Bildiyiniz kimi, həm premyer-liqada, həm də 1-ci divizionda klubların sayı artıb. Bu reallığı nəzərə alıb qərara gəldik ki, əvəzedici heyətin üzvlərini başqa komandalara icarəyə verək. Bunun sayəsində futbolçularımız daha çox oynamaq şansı qazanıb inkişaf edəcəklər. Yetirmələrimizin bir qismini elita klublarına, digər qismini isə "Araz-Naxçıvan"a icarəyə verəcəyik. Ona görə də əvəzedici komandanın fəaliyyətini dayandırdıq. Amma bu çox uzun çəkməyəcək. Düşünürəm ki, növbəti mövsümdən "Sabah-2" fəaliyyətini bərpa edəcək”.
Təcrübəli futbol adamı əvəzedici komandanın fəaliyyətini dayandırmasına AFFA-nın necə reaksiya verdiyini də açıqladı: "AFFA-ya bununla bağlı müraciət etdik. Niyə belə qərar verdiyimizi də ətraflı izah etdik. Sağ olsunlar, anlayışla qarşıladılar".
İqor Anatolyeviçin fikrincə, əvəzedici heyətin yoxluğu əsas komandaya mənfi təsir etməyəcək: "Əvəzedici heyətdəki perspektivli oyunçulardan bəzilərini əsas komandaya cəlb etmişik. Bundan başqa, əlimizin altında əsas baza olan U-19 komandamız da var. Bu komanda əvvəlki qaydada davam edəcək. Hələ ola bilsin, onların inkişafını bir az da sürətləndirmək üçün əlavə maliyyə ayırdıq. Başqa yaş qruplarımızdan da bacarıqlı gəncləri U-19-a cəlb edəcəyik. Akademiyamızın yetirmələrinin istedadını aça bilsək, gələcəkdə həm əsas, həm də əvəzedici komandanın sıralarını dolduracaqlar".
ABDULLA İSMAYILOĞLU
Digər xəbərlər
