Bu gün UEFA Region Kubokunun Azərbaycanda təşkil olunmuş ilkin seçmə mərhələsinin I qrupunda növbəti oyun keçirilib.

"Football-plus.az" xəbər verir ki, Estoniya təmsilçisi “Tallinna Zapoos” Qazaxıstanın “Kaskelen” komandası ilə qarşılaşıb. Görüş qazaxların 5:0 hesablı qələbəsiylə başa çatıb.

Görüşün baş hakimi azərbaycanlı referi Elçin Məsiyev olub.

Bu qrupda daha öncə keçirilmiş ilk oyunda “Tallinna Zapoos” Gürcüstan təmsilçisi “Basiani”yə də 1:3 hesabıyla uduzmuşdu. Qrupun sonuncu matçı iyunun 27-də “Kaskelen” və “Basiani” arasında baş tutacaq. Hazırda 3 xalı olan bu iki komandadan qalib gələn tərəf qrup qalibi kimi ilkin mərhələnin finalına vəsiqə qazanacaq.

İlkin mərhələnin digər qrupunda cəmi iki komanda mübarizə aparır: Azərbaycan çempionu “Cəbrayıl” və Belarusun “Kolos” komandası. Bu komandaların ilk oyununda “Kolos” 2:1 hesablı qələbəyə sevinib. Cavab görüşü sabah keçiriləcək.

Azərbaycanda təşkil olunmuş ilkin mərhələnin qalibi iyunun 29-da Şamaxıda baş tutacaq final matçında müəyyənləşəcək.

UEFA Region Kuboku
İlkin mərhələ
I qrup

25 iyun

Tallinna Zapoos – Kaskelen 0:5
Baş hakim: Elçin Məsiyev (Azərbaycan)
Baş hakimin köməkçiləri: Elşad Abdullayev (Azərbaycan), David Gabrovec (Sloveniya)
Dördüncü hakim: David Smayc (Sloveniya)
ASK Arena. Saat 16.00.