Mane: “Zaltsburq”da oynadığım vaxtlarda “Bavariya”nın çox oyununu izləmişdim” - AÇIQLAMA
Sadio Mane artıq “Bavariya”nın oyunçusudu. Cümə günü “Liverpul”la razılığa gələn Almaniya klubu onun təqdimatını dünən keçirib.
“Bavariya” ilə bir neçə gün əvvəl razılığa gələn Sadio çərşənbə axşamı Almaniyaya gəlib, tibbi müayinədən problemsiz keçəndən sonra Münhen klubu ilə 3 illik müqavilə imzalayıb. Əksər mənbələr “Bavariya”nın seneqallı futbolçu üçün 32 milyon avro təzminat ödədiyini xəbər verib. Bu transferin bonusları da nəzərə almaqla münhenlilərə maksimum 41 milyon avroya başa gələcəyi də qeyd edilib.
Sadionun təqdimatı çərşənbə günü “Alyants Arena”da təşkil edilib. Klubun prezidenti Herbert Hayner keçidi qısaca belə şərh edib:
“Sadio Mane dünya səviyyəli futbol ulduzudu. Belə oyunçunun sıralarımıza qoşulması “Bavariya”nın və bundesliqanın cəlbediciliyini göstərir. Azarkeşlər stadionları məhz belə oyunçular üçün doldururlar”.
İdman direktoru Hasan Salihamiciç transferi belə dəyərləndirib:
“Bavariya”ya dünya miqyasında tanınan və futbolda iz qoyan futbolçu gəlib. Maneni komandamıza gətirdiyimiz üçün fəxr edirik. O, danışıqların ilk günündən bizə “Bavariya”da oynamaq istəyini açıq şəkildə bildirmişdi. Onun böyük texniki potensialı və inanılmaz mentallığı hamıya bəllidi. Sadio əla struktura malik komandanın inkişafına öz töhfəsini verəcək. Manenin “Bavariya”ya gəlməsi bizim planlarımızın nə qədər böyük olduğunu göstərir. Yeni oyunçumuz Naqelsmannın oyun modelinə ideal şəkildə uyğun gəlir”.
“Liverpul”da 2016-cı ildən çıxış edən seneqallı hücumçu bu komandada ötən mövsüm bütün turnirlərdə keçirdiyi 51 oyunda 23 qolun və 5 məhsuldar ötürmənin müəllifi olub. Bu il milli komandası ilə Afrika çempionluğunu qazanan 30 yaşlı futbolçu təqdimat mərasimindəki çıxışı zamanı bu fikirləri dilə gətirib:
“Həqiqətən də, “Bavariya”da qərar tutduğum üçün özümü xoşbəxt sayıram. Danışıqların ilk günündən bu böyük klubun mənə ciddi maraq göstərməsinin şahidi oldum. Odu ki, keçidin reallaşacağına şübhə etmirdim. Karyeramda yeni çağırış başlayıb. Yeni klubumla həm daxili, həm də beynəlxalq turnirlərdə uğur qazanmaq istəyirəm. Hələ “Zaltsburq”da oynadığım vaxtlarda “Bavariya”nın çox oyununu izləmişdim. Bu klub həqiqətən də xoşuma gəlir!”
RAMİL YUSİFOV
Digər xəbərlər
