“Beşiktaş” “Fənər”in “28 çempionluq” iddiasını dəstəkləyirmi?
''Beşiktaş'' prezidenti Ahmet Nur Çəbi ''Ayntraxt''a transferi an məsələsi olan Rıdvan Yılmaz, eləcə də ''Fənərbaxça''nın 28 çempionluqla bağlı iddiası haqda diqqətçəkən açıqlamalar verib.
''Qartal''ın öz yetirməsi olan 21 yaşlı sol müdafiəçi Rıdvanın 6,5 milyon avroya frankfurtlulara satıldığı iddia olunsa da, Almaniya mətbuatı transferin 4 milyon avroya baş tutduğunu yazmışdı. ''Fənərbaxça''nın iddiasına gəlincə, İstanbul nəhəngi artıq uzun müddətdi federasiyaya müraciət edib və 1959-cu ildən əvvəl keçirilən çempionatların nəticələrinin qeydə alınmasını istəyir. Bu baş verəcəyi təqdirdə ''Fənər'' formasına artıq 5 ulduz taxacaq və 28 çempionluqla bu göstəricidə hamını üstələyəcək. TFF-nin əvvəlki başqanı Nihat Özdəmir dəfələrlə məsələni araşdırdıqlarını demişdi. Amma o, apreldə istefa verdi. İndi bu məsələdə yekun qərarı federasiyanın yeni prezidenti Mehmet Büyükekşi verəcək. Ahmet Nur Çəbini dinləyək:
''Ərsin Destanoğluna bir çox təklif var. Onunla bağlı qərarımızı hələ verməmişik. Amma Rıdvan Yılmazın transferi yekunlaşmaq üzrədi. Xırda detallar qalıb. Müxalif qüvvələr bu keçidin ətrafında süni ajiotaj yaratmağa çalışır. Bizim nəğd şəkildə alacağımız məbləğ 4 milyon avroya yaxındı. Qalan 2,5 milyon avro isə onun ''Ayntraxt''la müqavilə müddəti başa çatana qədər bizə ödəniləcək. Bundan başqa, sonrakı satışdan 20 faiz pay da götürəcəyik. Sadəcə, ödəmə ilə bağlı həll olunası bir-iki şey qalıb. Fikrimcə, həftənin sonuna qədər bu keçid rəsmi şəkildə açıqlanacaq. ''Fənərbaxça''nın keçmişdəki çempionluqlarla bağlı tələbinə gəlincə, bu məsələdə mövqeyimiz bəllidi. Bu tələb ədalət və vicdan əsasında həyata keçirilirsə, onu normal qarşılayırıq. Yox, orda hədəf 3 qəpik artıq pay almaqdısa və ya formadakı ulduzların sayı başqasınınkından daha çox olsun deyə həyata keçirilirsə, bunu dəstəkləyə bilmərik. Onsuz da futbolumuz çətin və sıxıntılı dönəmdən keçir. Belə məqamda bunlara yer yoxdu. Amma dediyim kimi qarşı tərəf, sadəcə, haqq-ədalətin yerini tapmasını istəyirsə, bu məsələyə vicdanlı şəkildə yanaşırsa, niyə də dəstək olmayaq?! Hamı üçün eyni şəkildə bu çempionluqlar keçərli olacaqsa, biz tərəfdən onu qəbul etmək baxımından heç bir problem yoxdu''.
Digər xəbərlər
