Dünən "Neftçi"nin ən məşhur futbolçularından olan Eduard Markarovun 80 illik yubileyi idi.

Veteran futbolçu peşəkar karyerasına məhz köklü klubumuzda başlayıb. "Football-plus.az" saytı olaraq Markarovla komanda yoldaşı olmuş "Neftçi" veteranlarının fikirlərini öyrəndik.

Rüstəm Rəhimov: "Eduard Markarov haqda nəsə deməmişdən əvvəl ölkə başçısı, cənab İlham Əliyevin 2009-cu ildə Bakıda erməni ziyallıları və ictimai xadimlərini qəbul edərkən həmin qrupda yer alan veteran futbolçu ilə bağlı məşhur "Markarovu təqdim etməyə ehtiyac yoxdu. O, hər iki respublikanın əfsanəvi futbolçusu olub" ifadəsini vurğulayardım. Mənə görə Markarov öz mövqeyində çox yaxşı futbolçu olub. Onu zəmanəsinin Messisi adlandırardım. SSRİ çempionatlarının ən yaxşı bombardirlərindən biri idi. Erməni olsa da, daşnak xislətli deyildi. Onun həm atası Artyom, həm də özü Bakıda dünyaya göz açıb. O özünü daim bakılı sayıb və Azərbaycan dilində danışıb. İnsan kimi də pis adam deyildi, azərbaycanlılara və futbolçularımıza qarşı ondan heç vaxt alçaqlıq, naqislik görməmişəm. İllər öncə Moskvada futbol tədbirində onunla görüşəndə, Azərbaycan və Bakı üçün çox darıxdığını vurğuladı".

Ağasəlim Mircavadov: "60-cı illərdə Azərbaycan klublarında erməni, rus, yəhudi futbolçular çoxluq təşkil edirdi. O vaxtı "Neftçi"yə Boris Arkadyev rəhbərlik edirdi. Məhz onun təkidiylə 1961-ci ildə Eduard Markarov komandaya cəlb olundu. Onun "Neftçi"də debütü uğurlu alındı və o 16 qol vuraraq SSRİ çempionatında 2 bombardirdən biri oldu. Adətən sovet futbolunda hücumçular ucaboy, taran tipli olurdular. Makarov isə bəstə boyuna baxmayaraq, güclü sürətə, texnikaya, cərimə meydançasında yaxşı açılmağa, yüksək qol duyumuna və assistentlik bacarığına malik idi. Erməni olması bizi heç vaxt narahat etməyib. Çünki özünü bakılı və azərbaycanlı hesab edirdi. Bir dəfə də olsun, ondan azərbaycanlılara qarşı xoş olmayan hərəkətlər görməmişik. İstər futbolda, istərsə də həyatda son dərəcə sadə insan idi. Ona məşq zamanı yaxınlaşan hər kəslə öz təcrübəsini bölüşər və kömək göstərərdi. Markarov 72 yaşını qeyd edərkən müsahibələrinin birində demişdi: "Mən Bakıda doğulmuşam və 29 il bu şəhərdə yaşamışam. Bakı mənim üçün doğma diyardı. Bakı üçün çox darıxmışam". Qısası, Eduard Markarovu Azərbaycan torpağı və "Neftçi" yetişdirib".

ABDULLA İSMAYILOĞLU