Vaxtilə perspektivli gənclərdən sayılan, bir neçə ölkədə legioner həyatı yaşayan millimizin sabiq üzvü Amit Quluzadə hazırda Avstriyada oynayır.

Özü də həvəskarların yarışında. Dünən onunla bu və başqa mövzular haqda söhbətləşdik.

- Azərbaycan premyer-liqasıyla yanaşı, Portuqaliya, Türkiyə, Yunanıstan, Bosniya və Hersoqovina, Kosovo, Moldova çempionatlarında çıxış etmisən. Necə oldu ki, birdən-birə Avstriya regional liqasında oynamağa qərar verdin?

- Moldovadan qayıdandan sonra bir müddət futbolsuz qaldım. Vaxtilə Bosniyada tanıdığım məşqçi Avstriyada oynayıb formamı bərpa etməyi təklif etdi. "Ştadl Paura"dan öncə Asiya klublarından təklif almışdım. Hətta onlardan biriylə şifahi razılığa da gəlmişdik. Qalırdı müqavilə bağlamaq. Sadəcə, Avropada oynamağı üstün tutdum və "Ştadl Paura" ilə 6 aylıq müqavilə bağladım.

- Regional liqada oynamağı karyeran üçün eniş saymırsan?

- Regional liqa deyib, buranı zəif bilməyin. Əslində çıxış etdiyim çempionat həm də Avstriyanın 3-cü liqası sayılır. Burda çox güclü rəqabət var. Bizdən fərqli Avstriyada kubok oyunları olduqca gərgin mübarizə şəraitində keçir. Bu mövsüm 3-cü liqanın 2 komandası bundesliqa klublarını mübarizədən kənarlaşdırdı. Regional liqa, demək olar, 1-ci liqayla bərabər səviyyədədi.

- Mövsüm ərzində 5 oyunda 297 dəqiqə meydanda olmusan. Az şans qazanmağının səbəbi nədi?

- Əslində 5 oyunda 2 məhsuldar ötürmə də vermişəm. Görünür, bu məqam gözünüzdən yayınıb. Komanda gənc yerli futbolçulara daha çox şans verir. Mənə lazım olan formamı bərpa etməkdi ki, onu da etmişəm. Müqaviləmin müddəti bitib və hazırda azad agent statusundayam.

- Təkliflər var?

- Hazırda Avstriyanın 1-ci liqasında çıxış edən iki komandayla danışıq aparıram. Hər ikisi ölkənin köklü klublarındandı. Əslində müqavilə bağlayıb Bakıya gələcəkdim. Sadəcə, Avropa İttifaqına daxil olmayan ölkələrin futbolçularına görə xüsusi vergi təyin olunduğundan danışıqlar uzanır. Avstriya 1-ci liqasında çıxış etməyim üçün klub mənə görə 5800 avro ödəməlidi. Keçidimdə maraqlı olan klublar da müqavilə şərtlərində vergini özümün ödəməyimi istəyir. 18-19 yaşım yoxdu ki, ancaq perspektivi düşünüm. Maddiyyat da önəmlidi. Avstriya Avropanın ən bahalı ölkələrindən biridi. Vergini ödəsəm, xərclərimi qarşılaya bilməyəcəm. Klublardan biri vergi məbləğini ödəsə, Avstriyada karyerama davam edəcəm. Başqa variant isə Lüksemburqdandı. Bu ölkənin "Proqress" klubu məni sıralarına qatmaq istəyir. Sadəcə, komandada yeni məşqçi təyinatı gözlənilir. Bu məsələ aydınlaşsa, taleyimə aydınlıq gələcək. Ümumilikdə bir həftəyə bütün məsələlər yekunlaşacaq.

- Özün legioner həyatı yaşamaqda qərarlısan?

- Şərtlər ürəyimcə olacaqsa, əlbəttə.

- "Milsami"dən ayrılandan sonra yarım ildən çox futbolsuz qaldın. Yerli klublardan maraqlananlar olmadı?

- İki klubdan təklif gəlmişdi, sadəcə, şərtlərdə razılaşmadıq.

- Bəs hazırda yerli klublardan təklif var?

- Ad açıqlamayacam, təxminən 20 gün əvvəl iki klubdan təklif gəlmişdi. Müqavilə şərtləri və maddi məsələlərdə razılığa gəlmədik.

- Paytaxt, yoxsa bölgə təmsilçiləriydi?

- Hər ikisi.

- Avstriya həyatından danışaq. Oranın qanunlarına, mentallığına uyğunlaşa bilmisən?

- Mənim üçün uyğunlaşma və ya uyğunlaşmama problemi yoxdu (gülür). Təbiəti zəngin ölkədi, çoxlu gəzməli yerləri var. Sanki nağıllar diyarındasan. Bu ölkənin təbiətinə heyranam.

- Avstriyalılarda xoşuna gələn cəhət nədi?

- Biz daha emosional, daim tələskən, qaçaqaçla yaşayan xalqıq. Avstriyalılar isə son dərəcə soyuqqanlı, sakit, hər şeyi planlaşdıran və dəqiq xalqdı.

- Ştadl Paura şəhərində kirayədə, yoxsa oteldə qalırsan?

- Klub mənim üçün ayrıca mənzil tutub.

- Mini-futbol millimiz Avropa çempionu oldu. Bu barədə təəssüratın?

- Komandamızın çempionluğundan qürur duydum. Orda çıxış edən futbolçuların hamsıyla dost-qardaşam. Yığmanın baş məşqçisi Elşad Quliyevlə lap yaxınam. Məni futbola gətirən insanlardandı. Heç kimi gözləmədiyi halda futbol yarışında çempion olmağı bacardıq. Bundan sonra da uğurlarımızın davamının gələcəyinə inanıram. Zəfər yazan milli üzvlərinin hamısına bir-bir zəng edib təbrik etmişdim. Qəzetiniz vasitəsiylə bir daha onları təbrik edirəm.

- Nə vaxtsa böyük futboldan mini-futbola keçidini görə bilərik?

- Açığı, bu haqda düşünməmişəm (gülür).

- Əsas yığmanın uğursuzluqları barədə nə deyə bilərsən?

- Son 4 oyunda millimiz potensialından aşağı çıxış etdi. Komanda 90 dəqiqə eyni tonusda mübarizə apara bilmir. Hər hissədə fərqli oyun nümayiş etdirir. Yer aldığımız qrup "ölüm qrupu" deyil. Hər 3 komanda “dişimizə görədi”, hətta onları üstələyə də bilərdik. Bu gün lider Qazaxıstandan daha səviyyəli heyətə malikik. 4 oyunda millimizdən ən azı 8 xal gözləyirdim. Amma həm potensialımızı tam ortaya qoya bilmədik, həm də bəxtimiz gətirmədi.

- Yığmanın sabiq üzvü kimi, səncə, “sükan arxasında” əcnəbi, yoxsa yerli məşqçi dayanmalıdı?

- Mən problemi məşqçini yerli-əcnəbi olmasında görmürəm. Ən böyük problem çempionatımızın səviyyəsinin aşağı olmasında, klubların sayının azlığındadı. Belə olan halda "Qarabağ"la kəllə-kəlləyə gələn komandalar yoxdu. Rəqabət olmayan çempionatda da nə səviyyə qalxır, nə də futbolçu inkişaf edir. Premyer-liqa ilə 1-ci diviziyon arasında böyük uçurum var. Aşağı liqalar yoxdu. Liqaların sayının artması vacibdi. Gənc futbolçular aşağı liqalarda üzə çıxır. Yerli və əcnəbi seleksiyaçılar Avstiyada mənim çıxış etdiyim regional liqa da daxil, bütün aşağı liqalarda gənc futbolçuları izləyirlər. Ölkə futbolunun, ö cümlədən yığmamızın inkişafını istəyiriksə, qeyd etdiyim problemləri həll etməliyik.

ABDULLA İSMAYILOĞU