Salah ÇL-in finalından və ''Qızıl top''dan danışdı
''Liverpul''un misirli ulduzu Məhəmməd Salah ''Frans Futbol'' jurnalına açıqlamalar verib.
İngiltərə Peşəkar Futbolçular Birliyi tərəfindən premyer-liqada mövsümün ən yaxşı futbolçusu seçilən təcrübəli vinger ÇL-in son finalından və ''Qızıl top''u qazanmaq arzusundan danışıb:
''Finalda biz qələbəyə layiq idik. Çünki qol epizodlarımız daha çox idi. Təkcə mənim 2-3 real fürsətim oldu. Amma Tibo Kutua oyunu inanılmaz səviyyədə keçirdi. Seyvlər etmək onun işidi. ''Real'' məhz bu cür performans sərgiləməsi üçün onu heyətinə qatıb. Bu, Kurtuanın gecəsi idi. Dünyanın ən yaxşı oyunçusu adını qazanmaq arzusunda olduğumu gizlətmirəm. ''Qızıl top''a sahib olmaq əsas hədəflərimdən biridi. Düzünü desəm, 7-ci pilləni tutduğum ötən ilki səsvermənin nəticələrindən sonra yaxşı mənada şoka düşdüm. Düzdü, bu mövsüm yaxşı oynadım. Amma ÇL-i qazana bilməməyim mənim şanslarımı azaldır. Bu il ''Qızıl top''u qazanmasam həvəsdən düşməyəcəm və növbəti il yenə buna cəhd edəcəm. Sonuncu dəfə afrikalılardan onu Corc Vea qazanıb. Misirli futbolçunun belə bir mükafata sahib çıxması həm Yaxın Şərq, həm də Afrika üçün çox böyük hadisə ola bilər. Bu ölkələrdə yaşayan milyonlarla insan qeyri-adi bir şey edə biləcəklərinə inanmağa başlayacaqlar. Çünki mən Misirin kiçik bir şəhərində doğulmuşam. Təsəvvür edin, mən əlimdə ''Qızıl top''la Misirə yollansam, həmyerlilərimin buna reaksiyası necə olar''.
Digər xəbərlər
