Salah ''Liverpul''da qalacaqmı?
Uzun müddətdi yeni müqavilə ilə bağlı ''Liverpul'' rəhbərliyi ilə razılığa gələ bilməyən Məhəmməd Salah ÇL-in finalına həsr olunmuş mətbuat konfransında diqqətçəkən açıqlamalar verib. Klubla 2023-ə qədər müqaviləsi olan misirli ulduzun bu yay komandanı tərk etmək ehtimalı yüksək qiymətləndirilirdi.
"Football-plus.az" xəbər verir ki, Salah ən azı bir mövsüm də komandada qalacağını deyib və ''Real''a qarşı oyundan danışıb: ''İndi məni yeni müqavilə maraqlandırmır. Pulu düşünən oyunçu kimi görünmək istəmirəm. Bunu 1-2 ay öncə də söyləmişdim. Komandamız üçün çox önəmli bir həftədi. Mən yalnız final matçına köklənmişəm. Müqavilə haqda danışmağın yeri deyil. Yalnız onu deyə bilərəm ki, gələn mövsüm də yüz faiz komandada qalacam. Sonrasına isə baxarıq. Finala çox motivasiyalı çıxacam. Həm ''Real''a qarşı son finalda yaşadıqlarımızı, həm də premyer-liqada çempionluğu 1 xalla əldən verdiyimizi nəzərə alsaq, bütün komanda bu qarşılaşmada yüksək motivasiya ilə oynayacaq. Hər birimiz həyəcanla oyunu gözləyirik və daha bir ÇL qazanmaq fürsətini əldən vermək istəmirik".
Digər xəbərlər
