Məşhur autosport.com saytında Azərbaycan “Qran-pri”si ilə bağlı maraqlı faktlar və rəqəmlər yer alıb. Həmin xülasəni təqdim edirik.

• Bakıda keçirilən beş “Formula-1” mərhələsinin hər birində fərqli pilot qalib gəlib.

• Yalnız iki pilot - 2016-cı ildə Niko Rosberq və 2019-cu ildə Valtteri Bottas poul-mövqeyini Bakı küçələrində qələbəyə çevirməyə nail olub.

• Serxio Peres və Sebastyan Fettel Bakı mərhələsində podiumların sayına görə rekordçudu. Meksikalı və alman pilotların hər biri üç dəfə finiş xəttinə ən tez çatan “üçlüy”ə daxil olub.

• Bakı Şəhər Halqasında yalnız 2016-cı ildə keçirilən debüt yürüşündə təhlükəsizlik maşınının trsasa çıxmasına ehtiyac olmayıb. Növbəti dörd yürüşdə təhlükəsizlik maşını Azərbaycan “Qran-pri”si distansiyasının üçdə iki hissəsini trassda keçirib, bu müddətdə 36 dövrə vurub.

• 2016-cı ildə sərbəst yürüşlərdə Valtteri Bottas “Formula-1” trasslarında əsas yolda sürəti saatda 378 kilometrə çatdıraraq maksimal sürət rekordu müəyyənləşdirib.

• Bakıdakı beş yürüşün üçündə ən çox sayda dövrədə liderlik edən pilot qalib gəlməyib. Qaliblər isə distansiyanın ən çoxu üçdəbir hissəsini yürüşün önündə getməli olub: 2017-ci ildə Daniel Rikkyardo qələbəyə gedən yolda 17 dövrədə, 2018-ci ildə Lüis Hemilton 3 dövrədə, 2021-ci ildə Serxio Peres 8 dövrədə liderlik edib.

• Hazırkı dünya çempionu Maks Ferstappen Bakıda heç vaxt finiş xəttinə dördüncü yerdən tez çatmayıb. Ferstappen beş yürüşdə cəmi 16 xal toplayıb. Bununla bərabər, məhz niderlandlı pilot Azərbaycan paytaxtında favorit sayılır. Dünyanın aparıcı bukmeker şirkətləri tərəfindən təqdim olunan əmsallar buna dəlalət edir. Ekspertlər Ferstappenin qalib gəlmək şansını 40 faiz qiymətləndirir, Bakıda onun əsas rəqibi olan Şarl Lekler isə bukmekerlərdən yalnız 33 faiz uğur şansı qazanıb. Maraqlıdı ki, ötənilki qalib Serxio Peresin zəfər qazanmaq ehtimalı 14 faiz qiymətləndirilib.

• 2016-cı ildə Bakıda keçirilən 1-ci yürüş o qədər sakit, sonrakı 4 yürüş isə əksinə, o qədər xaotik olub ki, Bakı mərhələsinin ilk qalibi Niko Rosberq pelotonun başlanğıcında dövrələrin sayına görə hələ də 1-ci yerdədi. Azərbaycan paytaxtında cəmi bir dəfə çıxış etmiş bu alman pilot 51 dövrədə lider kimi siyahıda birincidi. Bu göstərici üzrə 2-ci yeri Valtteri Bottas (49 dövrə), 3-cü yeri Lüis Hemilton (43 dövrə) tutur.

ORXAN