Azərbaycan Cüdo Federasiyası narkomaniyaya qarşı kampaniyaya başlayıb.

"Football-plus.az" xəbər verir ki, BMT-nin Baş Assambleyası tərəfindən 26 iyun tarixi Narkomaniyaya və Narkobiznesə qarşı Beynəlxalq Mübarizə Günü elan edilib. Bu günün əhəmiyyəti və vacibliyini geniş ictimaiyyətə çatdırmaq üçün Azərbaycan Cüdo Federasiyası (ACF) “İdmanı seç, sağlam qal!” və “Narkotikə yox” şüarları altında kampaniya elan edərək səsini eşitdirməyə və bütün idman ictimaiyyətini səfərbər olmağa çağırır. Kampaniyanın əsas məqsədi yeniyetmə və gəncləri sağlam həyat tərzi seçməyə, asudə vaxtını daha səmərəli keçirməyə və zərərli vərdişlərdən uzaq olmağa təşviq etməkdi.

Cüdonun cəmiyyətdə kütləviləşməsi, müsbət və maarifləndirici dəyərlərə sahib olması onun sağlam həyat tərzinin təşviq edilməsində və müsbət sosial dəyişikliklərə töhfə vermək gücünü vurğulayır.

Azərbaycan cüdo ailəsinin üzvləri narkotikə yox deyərək kampaniyaya qoşulublar. Bununla da cüdo ailəsi sağlam cəmiyyətlərin qurulmasına sadiq olduqlarını nümayiş etdiriblər. Bu günün önəmini vurğulamaq üçün ACF estafeti Güləş, Gimnastika, Həndbol, Stolüstü tennis, Ağır Atletika federasiyalarına ötürür!

Bizə qoşul! İdmanı seç, sağlam qal! Narkotikə yox!