Srağagün Bakıda İspaniyanın “Antiguoko” Futbol Akademiyasının filialının açılış mərasimi keçirildi.

Tədbirdə akademiyanın prezidenti Edorto Salegi, "Barselona"nın sabiq vitse-prezidenti Emili Rouso Pares, Azərbaycan-İspaniya Ticarət Assosiasiyasının prezidenti Fərid Mustafayev, Milli Məclisin deputatı Tahir Kərimli, “Antiguoko” Bakı filialının rəhbəri, əməkdar məşqçi Zamin Əsədullayev, futbol ictimaiyyətinin nümayəndələri, azyaşlı futbolçular və başqa qonaqlar iştirak edirdi.

Fəxri kürsüyə dəvət olunan Əsədullayev akademiyanın fəaliyyəti ilə bağlı qonaqlara mlumat verməklə yanaşı, əsas məqsədlərinin burda yetişəcək istedadlı futbolçuların gələcəkdə İspaniyaya yollanmasını təmin etmək olduğunu dedi. Ondan sonra mikrofon arxasına “Antiguoko”nun prezidenti Salegi keçdi. İspaniyalı qonaq əvvəlcə akademiyanın tarixi barədə danışdı, tanınmış yetirmələrinin adlarını sadaladı. O çıxışı zamanı Azərbaycanı seçmələrinin səbəbini açıqladı:

"Layihənin bünövrəsini qoyanda futbolun inkişaf edəcəyinə inanırdıq. Zamanla istedadlı futbolçuları İspaniyadakı akademiyamıza aparacağıq. İşə həvəslə və ciddi yanaşsaq, uğur qazanacağıq".

2019-cu ilədək "Barselona"nın vitse-prezidenti vəzifəsində çalışan Pares isə “burda belə bir akademiyanın açılması Azərbaycan üçün böyük xoşbəxtlikdi” söyləməklə yadda qaldı.

Daha sonra Mustafayev çıxış üçün kürsüyə dəvət olundu. İş adamı bildirdi ki, bu ideya Azərbaycan futbolunu inkişaf etdirməyin yollarını müzakirə edərkən ortaya çıxıb:

Milli Məclisin deputatı Tahir Kərimli layihənin uğurlu olacağına inandığını söylədi: "Biz ispanlarla oxşar millətik. İnanıram ki, bu akademiyanın filialının Bakıda açılması ölkə futbolunun inkişafına töhfə verəcək. Bu gün ispan futboluna bütün dünya pərəstiş edir".

Tədbirin sonunda üzərində “Antiguoko” Futbol Akademiyasının loqosu olan tort kəsildi. Yeri gəlmişkən, akademiyanın Bakıdakı filialı Binəqədi rayonu ərazisində fəaliyyət göstərəcək. Fürsətdən istifadə edib tədbirə fəxri qonaq qismində dəvət alan “Barselona”nın sabiq vitse-prezidenti Emili Rouso Pareslə söhbətləşdik.

- Əvvəlcə səfərlə bağlı təəssüratınızı bilmək maraqlı olardı. Özünüzü Bakıda necə hiss edirsiz?
- Bu, Bakıya ikinci səfərimdi. Çox gözəl şəhərdi. İnsanları istiqanlı və qonaqpərvərdi. Burda olduğum üçün şadam.

- İlk səfəriniz nə vaxt olmuşdu və nə ilə bağlı idi?
- Birinci səfərim ötən ilin dekabrında Azərbaycanda investisiya proqramlarının inkişafı ilə bağlı gerçəkləşmişdi. Azad olunan ərazilərə investisiya yatırmaqla bağlı idi.

- Azərbaycan futbolu deyəndə gözünüzün önündə nə canlanır?
- Azərbaycan futbolu dünyada elə də tanınmır. Futbolçunun yüksək kompetensiyası olmalıdı ki, öz səviyyəsini qaldırsın.

- Azərbaycan futbolu dünyada çox tanınmasa da, "Qarabağ" avrokuboklarda adından söz etdirə bilib. Hətta 2017/18 mövsümündə Çempionlar Liqasının qrupunda Madrid "Atletiko"su ilə hər iki oyunda heç-heçə etmişdi. Yəqin ki, bu komandanı tanıyırsız...
- Bilirəm ki, "Qarabağ" Azərbaycanın ən yaxşı komandalarından biridi. Ağdamı təmsil etsələr də, ev oyunlarını Bakıda keçirirlər. Yaxşı oyunçularının olmasından xəbərdaram.

- Ötən əsrin 90-cı illərində İspaniyada Vəli Qasımov adlı azərbaycanlı futbolçu çıxış edib. Onunla bağlı bilginiz var?
- Bəli, elə bir futbolçu yadımdadı. Adlar çox olmadığı üçün tək-tük oyunçular tanış gəlir. Səhv etmirəmsə, "Betis"də də çıxış edib.

- Bəs İspaniya sequndasında çıxış edən, hazırda isə "Neftçi"nin formasını geyən Azərbaycan millisinin yarımmüdafiəçisi Eddi İsrafilov sizə tanışdı?
- Aşağı liqaları izləmədiyim üçün tanımıram.

- Sizcə, hansısa azərbaycanlı futbolçunun "Barselona"nın formasını geymək xəyalının gerçəkləşməsi üçün nə lazımdı?
- "Barselona" həmişə bütün dünyada istedad axtaracaq. Belə oyunçuları seçib öz akademiyasına cəlb etmək üçün hər yola əl atacaq. Bizdə xüsusi skautlar var ki, sırf bu istiqamətdə çalışırlar. Həmin uşaqlar gələcəkdə komandamızda oynayırlar. Azərbaycana futbolun baza strukturu lazımdı.

- "Barselona" akademiyasında sırf Qafqaz regionu üzrə skautlar var?
- Əlbəttə. "Barselona" çox qəliz struktura malik klubdu. Bəyənilən futbolçunun yaşı mütləq 12-dən çox olmamalıdı.

- La Masiyanın özəlliyini bir cümlə ilə necə ifadə edə bilərsiz?
- La Masiyanın özünəməxsus infrastrukturu var və futbolçuları buna uyğun inkişaf etdirir. Həmçinin "Barselona"nın özünə aid başqa akademiyaları da var. Düzdü, onlar La Masiya kimi fəaliyyət göstərmir. Məsələn, “Antiguoko” Futbol Akademiyası kimi. Belə akademiyalarla da əməkdaşlıq “Barselona”nın uşaq futbolu ilə bağlı yürütdüyü siyasətin bir parçasıdı.

- Vaxtilə Madrid "Atletiko"su ilə əməkdaşlıq çərçivəsində klubun formasında "Land of fire Azerbaijan" sözləri yer almışdı. Bu barədə nə deyə bilərsiz?
- "Atletiko" İspaniyanın 3-cü böyük klubudu. Yaxşı akademiyaları var. Mənim üçün "Barselona" və "Real"la İspaniyanın başqa klubları arasında bir fərq var: bu iki komandanın sahibi yoxdu, xalqın klubudu. Bütün dünyaya açıqdılar. Lionel Messi "Barselona"ya gələndə ona inkişaf hormonu çatışmazlığı diaqnozu qoyulmuşdu. Klub onun böyüyəcəyini bilməyə-bilməyə müalicəsinə pul ayırdı.

- Amma Messi bu qədər fədakarlıq edən "Barselona"nı PSJ-yə dəyişdi. Yəni pulu seçdi...
- Xeyr, pulu seçmədi. Onun agenti atasıdı. Bu keçiddə atasının israrı daha çox rol oynadı. Messi "Barselona"dan öz xoşu ilə getmədi. Komandanı ağlaya-ağlaya tərk etdi.

- Argentinalı hücumçuya “yad planetdən gələn oyunçu” deyirlər. Doğrudan belədi?
- Çox fərqli oyunçudu. O, futbolla yaşayan insandı. Titul Messi üçün olduqca vacibdi. Maliyyə onun üçün ikinci dərəcəlidi. Mənə elə gəlir ki, argentinalı superqəhrəmandı. Onunla yaxşı münasibətim var. Ünsiyyətcil deyil, çox az danışır. Böyük futbolçudu. Düşünürəm ki, uzun müddət onun kimi oyunçu yetişməyəcək.

RƏŞAD