Rusiyanın hərbi təcavüzünə uğradıqdan sonra Ukraynada bu mövsüm yarımçıq dayandırılan ölkə çempionatının gələn mövsüm üçün aqibəti maraq doğurur.

Prezident Vladimir Zelenskinin fərmanı ilə ölkədə hərbi vəziyyət mayın 25-dən sonra daha 90 günlük müddətə artırılıb. Bu isə Ukrayna çempionatının ölkədə keçirilməsini praktiki cəhətdən mümkünsüz edir. Ukrayna klubları yeni variantlar üzərində baş sındırır. Bu arada ukraynalı jurnalist İqor Burbasın məlumatına görə, bir variant ölkə çempionatını birilliyə təxirə salmaqdısa, digər variant turniri xarici ölkələrdən birində keçirməkdi. Söhbət ilk növbədə Türkiyə, Polşa və Slovakiyadan gedir. Amma Burbasın sözlərinə görə, “Şaxtyor”, Kiyev “Dinamo”su və “Dnepr-1” kimi klublar Türkiyə variantına üstünlük verir. Çünki qardaş ölkənin infrastrukturu buna imkan verir. Həm də legionerləri ora gətirmək daha asan olacaq. Məsələn, oyunların Antalyada keçirilməsi variantı var. Ukrayna təmsilçiləri bu şəhəri gözəl tanıyır və tez-tez burda toplanış keçirlər. Amma hələ ki bunun konkret necə tənzimlənəcəyi bəlli deyil. Klubların bir neçə aylığa Türkiyəyə yollanacağı, yoxsa onların Ukraynada məşq edib yalnız oyun ərəfəsində Türkiyəyə gedəcəyi bilinmir. Bu məsələnin qarşıdakı həftə klub rəhbərləri arasında keçiriləcək toplantıda həllini tapacağı gözlənilir.

Bu arada “Dnepr-1”in 48 yaşlı xorvatiyalı baş məşqçisi İqor Yoviçeviç də çempionatın xarici ölkələrdən birində keçirilməsi variantını dəstəklədiyini bildirib:

“Çox spesifik şərtlər yaranıb. Xorvatiyada da 1991-95-ci illərdə müharibə olmuşdu. Amma futbol dayanmamışdı. Futbol xalqa və insanlara çox lazımdı. Çünki o, insanlara emosiya bəxş edir. 90 dəqiqəliyə bütün çətinlikləri və problemləri unudursan. İndi Ukraynada ölkə naminə döyüşənlər arasında da çoxlu futbolsevər var. Onlar “Şaxtyor”a, “Dinamo”ya, “Dnepr-1”ə azarkeşlik edirlər. Həm klub, həm də ölkə üçün döyüşürlər. Bu, bir-biri ilə əlaqəlidi. Çempionatın başqa ölkədə keçirilməsi mümkün variantlardan biri kimi görünür. Bir qədər çətin olsa da, bunun üçün bütün şərtləri yaratmaq mümkündü. Həm də avrokuboklarda oynayanlar UEFA-dan mükafat alacaq. Onlar bu mükafatın müəyyən hissəsini başqa klublara verə bilər. Ən azı otel, meydan, avtobus xərcini bu cür ödəmək mümkündü. Bu məsələdə hamı bir-birinə dəstək verməlidi''.