Fransada futbolçu olduğunu iddia edən şəxs həbs olunub.

Hadisə ötən il dekabrın 28-də baş versə də, bu, məhkəmənin araşdırmasından sonra məlum olub.

Adı açıqlanmayan bir kişi qaldığı oteldə pul ödəməmək üçün özünü PSJ-nin oyunçusu kimi təqdim edib. 28 yaşlı şəxs Fransa Gənclər Kubokunun “Lizye” – PSJ matçını (1:5) izləmək üçün Lizye şəhərinə gəlib. Otelə daxil olaraq özünü PSJ-nin oyunçusu adlandırıb. O, mehmanxanada iki gecə qalıb və bunun üçün 227,4 avro ödəməli olub. Həmin şəxs otel işçilərindən hesabı onun göstərdiyi telefon nömrəsinə - guya menecerinə göndərməyi xahiş edib. Amma nömrənin istifadədə olmadığı üzə çıxıb. Məhkəmə araşdırması nəticəsində fırıldaqçının daha əvvəl 12 dəfə qanun pozuntusuna əl atdığı məlum olub.

Hakim PSJ-nin “oyunçusu”na iki aylıq həbs cəzası kəsib.