Region Liqasında yarımfinal oyunları start götürür.
Mərhələnin ilk oyunu bu gün baş tutacaq. “Cəbrayıl”la “Qusar” arasında qarşılaşmanın start fiti saat 16.00-da, “ASK Arena”da səslənəcək. İkinci oyunda isə "Xan Lənkəran"la "Araz Naxçıvan" üz-üzə gələcək. Bu görüş sabah, saat 16.00-da, "ASK Arena"da gerçəkləşəcək. Maraqlıdı, bu oyunlara region komandalarının nə qədər azarkeşi gələcək? Klub rəhbərliyi azarkeşlərin oyuna gəlməsi üçün şərait yaradıbmı? Bu suala aydınlıq gətirmək üçün komandaların nümayəndələri ilə əlaqə saxladıq.
Famil Məmmədov (“Xan Lənkəran”ın mətbuat xidmətinin rəhbəri): “Bəli, Lənkərandan azarkeşlər üçün iki avtobus ayrılıb. Eyni zamanda, onların gediş-gəliş xərci də qarşılanacaq. Əlavə də şəxsi maşınlarla gələnlər olacaq. Klub tərəfindən 100 nəfər gətirilir. Amma ehtimal edirik ki, 1000-1500 və daha çox azarkeş komandanı dəstəkləyəcək. Çünki Bakıda da kifayət qədər kütlə var. Müəyyən şəxslər var ki, Bakıdan gələcəklərini bildiriblər. Hətta 1500-dən də çox gözləyirik. Azarkeş sayımız 2000 nəfər də ola bilər.”
Cavid Hüseynov (“Cəbrayıl”ın baş məşqçisi): “Düşünürük ki, minimum 300 azarkeş gələcək. Çünki 200 nəfər “Energetik”lə oyuna gəlmişdi. Ona görə bu oyunda ən azı 300 azarkeş gözləyirik. Bizim azarkeş qrupumuz var, onlar bu yöndə fəaliyyət göstərir. Öz tərəfdarlarımız 200-300 nəfərdi. Bundan əlavə, futbol ictimaiyyətindən də gələnlər çox olacaq. Hamı maraqlanır və stadiondan canlı izləmək istəyir. Oyun “ASK Arena”da olduğuna görə azarkeşlər yol xərcini özləri qarşılayır. Düzdü, onlara müəyyən qədər dəstək oluruq. Amma özümüzün də mailiyyə problemimiz olduğuna görə çox kömək ola bilmirik”.
Sakit Rzayev (“Araz Naxçıvan”ın idarə heyətinin sədr müavini): “Bildiyiniz kimi, Bakıda da naxçıvanlılar çoxdu. Əvvəllər də bizim həm Bakıda, həm də Naxçıvanda fəaliyyət göstərən fanklubumuz var idi. İndi də Bakıdakı fanklublarımızla bağlı işlər aparılır. İnşallah, yaxşı dəstək olar. Lakin biz hələ ki onlara maliyyə dəstəyi vermirik. İndiyə qədər həvəskar komanda idik. Regionlarda oyunumuz olmurdu. Amma növbəti mövsüm 1-ci diviziona qatılacağımıza görə bu istiqamətdə də işlər aparılacaq. Təbii, bəzi lazımi vasitələr - məsələn, bayraqlar, formalar və sair – ilə azarkeşləri təmin edirik”.
Vüqar Asalıyev (“Qusar”ın kapitanı): “Hələ ki 10-a yaxın avtobus olacaq. Təxminən 300-500 aralığında azarkeşin gələcəyini gözləyirik. Yol xərcini də qusarlı iş adamları qarşılayacaq”.
ŞAİR ABDULLA