“Barselona” La Liqanın son turunda “Malyorka”nı məğlub etməklə evdəki uğursuz oyunlar seriyasına son qoydu.

Buna qədər isə komanda “Nou Kamp”da ardıcıl üç məğlubiyyətlə barışmışdı. Klub rəhbərliyi “Rayo Valyekano”ya məğlubiyyətdən (0:1) sonra kiçik böhrandan qurtulmaq üçün orijinal çıxış yolu tapdı – kilsədə iclas keçirildi.

Laporta və Direktorlar Şurası Monserrat kilsəsində toplaşdı

“Barselona”nın bossları aprelin 26-da uzaq 1025-ci ildə əsası qoyulan Monserrat kilsəsində toplaşdı. Bu kilsə Kataloniyanın dini rəmzi və bütün dünyadan olan katoliklərin ziyarət yeri sayılır. Xuan Laportanın fikirləri:

“Tanrıya minnətdarlıq, “Barsa” üçün dualar etdik. İndi bütün diqqətimiz çempionata yönəlib. 2-ci yeri tutmalıyıq ki, Çempionlar Liqasına birbaşa vəsiqə qazanaq. İrəlidə bizi hər biri finala bərabər olan həlledici oyunlar gözləyir”.

Laporta ilə yanaşı, demək olar ki, bütün klub funksionerləri kilsədə idi – idman direktoru Mateo Alemani başda olmaqla. Vitse-prezidentlər Yelena Fort, Eduard Romeo, Rafa Yuste və Antonio Eskudero, həmçinin direktorlar Ksavye Barbani, Mikel Kemps, Xosep Mariya Albert, Xordi Llaurado, Xosep İqnasi-Masia, Auereli Mas, Ksavye Puç, Xoan Sole və Xoan Soler (bəli, bunlar fərqli adamlardı).

Kilsə ziyarətinin ardından rəhbərlik iqtisadi və idman məsələlərini müzakirə etdi. Əsas mövzular 2021/22 mövsümündə əməkhaqqı tavanında qeydə alınan mənfi balans (“Barsa”da – 144 milyon avro), CVC investisiya fondu ilə anlaşma (klub bundan 270 milyon avro qazanacağına ümid edir) və Usman Dembele, Serxio Roberto və Qavi ilə yeni müqavilə mövzusunda aparılan danışıqların gedişi idi.

Laporta 2021-də də kilsəyə baş çəkmişdi

Monserrat kilsəsinin “Barsa” ilə əlaqələrinin üzərinə qayıdaq. Xuan Laporta bura artıq 2-ci dəfə gəlirdi. İlk səfər 2021-də olmuşdu. Həmin vaxt onu kilsənin baş rahibi Bernat Xulio müşayiət edirdi. Laporta onda “Barselona” ilə Monserratın eyni dəyərləri bölüşdüyünü demiş və klubun 2025-də kilsənin minilliyində iştirak arzusunu çatdırmışdı.

Kilsənin uşaq xoruna heyran qalan prezident uşaqları hətta “Nou Kamp”a da dəvət etmişdi. İspaniya mediası yazırdı ki, uşaqlar Kilian Mbappe ilə bağlı transfer planlarından vaz keçməyi, diqqətin Erlinq Holanna yönəlməsini istəyib. Amma çətin ki, növbəti mövsümdə Mbappe ilə Holannı “Barsa”da görə bilək. Levandovskinin gəlişi isə mümkündü.

Kilsədə “Barsa”ya görə narahat idilər

2019-u sonunda “Barsa” 2018/19 mövsümü ilə bağlı sənədli film çəkdi. Orda “Liverpul”un ÇL-dəki geridönüşünə də yer ayrılmışdı. Kadrlardan da görünürdü ki, Monserrat kilsəsinin üç rahibi komandanın halına ən çox can yandıranlardandı. Komanda “Enfild”dəki cavab görüşünə yollananda Kataloniyada hər kəs dua edirdi. Xatırladaq ki, onda “Barsa” yarımfinalın evdəki ilk oyununda 3:0 hesabıyla qalib gəlmiş, cavab görüşündə isə 0:4 uduzmuşdu.

Sənədli filmdə maraqlı kadrlar var: Oricinin qələbə topundan sonra “Allahım!” qışqırığı, oyunun gec başlamasına görə narahatlıq (“səhər ibadəti üçün qalxmaq lazımdı”) və əlbəttə, sadiqliklə bağlı gözəl nitq: “Zəmanəmizdə sadəqət aradan qalxıb. Siyasətdə belədi – adamlar bir partiyadan başqasına qaçırlar. Ailələrdə də itirlib. Bəs nəyə sadiqlik qalıb? “Barsa”ya!”

Bax, “Barsa” ilə Monserrat kilsəsi, din arasındakı əlaqələrin məzmunu belədi...