Türklərin əsas hədəfi birinci olmaqdı - AÇIQLAMA
“Azərbaycan xalqına və Mingəçevir əhalisinə təşəkkür edirəm. Ölkə başçısı cənab İlham Əliyevə və Birinci vitse-prezident Mehriban Əliyevaya bu yarışa dəstək olduğu üçün minnətdaram”.
“Football-plus.az” saytının məlumatına görə, bunu azad olunmuş torpaqlarımızda ilk beynəlxalq turnir – “Prezident kuboku-2022”nin bu gün Mingəçevirdə baş tutan paradından sonra Türkiyə Avarçəkmə Federasiyasının İdarə Heyətinin üzvü, Etika Komitəsinin sədri Bülənt Ərən söylədi O Azərbaycanda olduqları üçün çox sevinclu olduqlarını da bildirdi:
“Türkiyə hər zaman Azərbaycanın yanındadı və olacaq. Biz burada bir daha anladıq ki, həqiqətən biz bir millət, iki dövlətik. Yaşasın Azərbaycan, yaşasın Türkiyə! “Prezident kuboku-2022”yə gələn idmançılarımız son olaraq Xorvatiyanın paytaxtı Zaqrebdə iştirak ediblər. Dünya və Avropa çempionatlarının qalibləri olan yığma üzvləridi. Bu yarışda da uğurlu nəticəyə ümid edirik”. Türkiyə millisinin avarçəkəni Ali Asaf Çiftçi isə hədəfinin çempionluq olduğunu vurğuladı: “Hava Limanından başlayaraq bizi gözəl qarşıladılar. Təşkilatçılıq çox yaxşıdı. Burdakı hədəfimiz əlimizdən gələnin ən yaxşısını edib, birinci olmaqdı”.
“Ay-ulduzlular”ın kanoeçisi İrəm Uzun da Azərbaycana uğurlu nəticə üçün gəldiyini bildirdi: “Çox gözəl qarşılandıq. Hamı çox həyəcanlıdı. Burda olmaqdan çox qürurluyuq. Ümid edirəm ki, ölkəmizi layiqincə təmsil edəcəyik. Onun üçün burdayıq. Azərbaycana ilk dəfə gəlirəm. İnsanları çox mehriban, qonaqpərvərdi”.
RƏŞAD, Mingəçevir
Digər xəbərlər
