Cari mövsümün “Səbail” üçün uğursuz keçdiyi heç kimə sirr deyil.

Afdandil Hacıyevin çalışdırdığı “dənizçilər” mövsümün əvvəlindən sonuncu yerdə necə lövbər salıbsa, sona 4 tur qalmış da yerindən tərpənməyib. Bayıl təmsilçisinin zaman-zaman maddi cəhətdən problemlər yaşadığını da futbolla maraqlanan hər kəs bilir.

Ancaq deyəsən, “Səbail” üçün “qara günlər” başa çatmaq üzrədi. Daha dəqiq desək, “Football-plus.az” saytına daxil olan məlumata görə, növbəti “futbol ili”ndən “dənizçilər” premyer-liqanın mükafatçıları arasına düşməyə çalışacaq. Bunun üçün isə artıq indidən işlər başlayıb. Belə ki, etibarlı mənbədən əldə etdiymiz bilgiyə əsasən “Səbail” mövsümlərarası fasilədə toplanış üçün Türkiyə və ya Avstraiyada toplanış keçməyi planlaşdırır. Klub rəhbərliyi hazırda bu iki variant üzərində çalışır. Bundan başqa Bayıl təmsilçisi heyəti gücləndirmək yönündə də qollarını çırmalayıb. Söylənilənlərə inansaq, Afdandil bəy artıq 5-6 yeni futbolçu ilə şifahi razılığa gəlib və iyunun ilk günlərində onlarla rəsmi müqavilə imzalanacaq. Düşərgəyə həmçinin səviyyəli legionerlərin cəlb olunması da gündəmdədi. Agentlərə dəyəri 150-200 min manat aralığında dəyişən legionerlər tapmaq tapşırılıb.

RƏŞAD