Razi Nurullayev “İmişli” üçün iş adamları ilə danışacaq.


AFFA İcraiyyə Komitəsinin dünənki qərarına sevinən bölgələrdən biri də İmişlidi. Bu rayonu isə Milli Məclisdə futbola heç də biganə olmayan Razi Nurullayev təmsil edir. Milli Cəbhə Partiyasının sədri aprelin 21-də İmişlidə olarkən “Zəfər yolu” futbol komandasına da baş çəkmişdi.

- Yəqin xəbəriniz var, "İmişli" də gələn mövsüm 1-ci divizionda oynayacaq.

- Bu hədəfə aparan yol, görülən işlər heç də asan olmayıb. Bu işlərdə rolum olduğuna görə xəbəri böyük sevinc hissi ilə qarşıladım. “İmişli”nin çox əzmkar və qətiyyətli baş məşqçisi olan Ruhid Usubovun ruhdan düşməməsi və ardıcıllığı da əsas məqamlardan biridi. Klubun bütün futbolçularını, məşqçilərini, dəstəkçilərini və dostlarını ürəkdən təbrik edirəm. AFFA-nın vitse-prezidenti hörmətli Elxan Məmmədova dərin təşəkkürümü bildirirəm. Maraqlı görüşümüz oldu və mən ona ətraflı məlumat verməyə çalışdım. Yeni baş katib təyin olunan Sərxan Hacıyevlə də danışdıq və o tövsiyə etdiyim nümayəndə heyətini qəbul edib dinlədi, işlərlə yaxından tanış oldu. Sərxan müəllimə də, AFFA-nın prezidenti Rövnəq Abdullayevə də təşəkkür edirəm. Çünki onun da dəstəyi olub. İmişlidə həmişə futbol olub, amma gərək futbol da bilən əllərdə, ürəyi yanan kəslərdə olsun. Bu gün İmişli futbolunun yetirmələri ölkənin hər yerində oynayır. Amma belə komanda bacarıqsızlıq və şəxsi maraqlar ucbatından dağıdıldı. Mən futbol biznesi haqda bir sözü deməyi xoşlayıram. Futbol biznesdi və onun üzərindən pul qazanmağa çalışmaq eyib deyil. Amma bu istək yalnız pul qazanmaq üzərində qurulanda futbol dağılır. Futbol biznesi ilə məşğul olanın marağı birinci futbol, ikinci pul olanda komanda inkişaf edir. Pul istəyi birinci yerə keçəndə futbol məhv edilir. İmişlidə də belə oldu.

- "İmişli" ilə bağlı hansı planlar var?

- Əlbəttə, “İmişli” üçün çox şeylər düşünürük. İdarəçi, məşqçi və oyun komandası olmalıdı. Bunlar əl-ələ və sıx təmasda işləyəndə hər şey alınır. İnanıram ki, “İmişli” ciddi uğurlar əldə edə biləcək. Bizim isə əlimizdən nə gəlirsə, dəstək olmağa çalışacağıq. Yaxınlarda komanda üzvləri ilə görüşüb növbəti addımları müəyyənləşdirmək istəyirəm.

- Bu qərardan xəbəriniz var idi? Yoxsa AFFA sizə supriz elədi?

- AFFA-dan belə qərar gözləntim var idi. Dediyim kimi, görüşmüş və müzakirələr aparmışdım. Amma bu qədər tez qərar verilməsi mənim üçün də xoş sürpriz oldu. Bir daha AFFA-nın rəhbər heyətinə təşəkkürümü bildirirəm.

- Rayonun iş adamlarını bu istiqamətdə dəstək olmaları üçün cəlb etmək mümkündü?

- Futbol həm də biznesdi. Azərbaycanda bunu real biznesə çevirə bilmirik. Dövlət orqanları dövlətin büdcəsinə gözünü tikir, futbol komandaları da AFFA-nın büdcəsinə. Bunlar onsuz da var, heç yerə qaçan deyil, əlavə resurslar cəlb etmək lazımdır. İş adamları ilə danışacam və görək kimin marağı var. Digər tərəfdən isə komanda gərək gözəl oyun nümayiş etdirib diqqəti özünə yönəldə bilsin. Gözəl oyun izləyə bilsək, biznesin də marağı olacaq.

GÜNAY VƏLİYEVA