İranlı ixtiraçı Azərbaycan klubuna sponsorluq etmək istəyir - ÖZƏL AÇIQLAMA
Nadir Qasımov ürəyindən əməliyyat olunub.
Aprelin 15-də cərrah bıçağı altına uzanan mütəxəssisin sağlıq durumu maraq doğurmaya bilməz. Bunu nəzərə alıb onunla əlaqə saxladıq. Nadir bəy “Football-plus.az” saytına bunları söylədi:
“İndi pis deyiləm. Yavaş-yavaş özümə gəlirəm. Əməliyyatımdan 13 gün keçib. Şükür olsun, yaxşıyam”.
Görəsən, futbol ictimaiyyətindən Qasımova dəstək göstərən olub? Həmsöhbətimizin bu suala cavabı belə oldu:
“Klublardan heç nə edən olmadı. Amma AFFA-ya müraciət etmişəm. Mənə dedilər ki, çağırış göndər. Mən də Rövnəq müəllimin adına ərizə yazdım. Lakin hələ cavab verilməyib”.
Son günlər mediada Nadir Qasımovun prezidenti və baş məşqçisi olduğu “Şuşa Qarabağ”ın yenidən bərpa olunacağı ilə bağlı xəbərlər yayılıb. Sən demə, Şuşanın düşmən işğalından azad olunduğunu nəzərə alan mütəxəssis AFFA-ya müraciət edib:
“Mənə dedilər ki, 1-ci divizionda olmasa da, Region Liqasında çıxış edə bilərik. Yarım il öncə sponsorlarla danışırdım. O adamlar özləri mənə dəstək üçün can atırdılar. Dünya səviyyəli bir iranlı ixtiraçı var. Şuşa alınanda mənimlə əlaqə saxladı, təbrik etdi. Həm də dedi ki, 6 şəriki ilə birlikdə “Şuşa Qarabağ”ın yenidən çempionata qayıtmasında bütün gücünü səfərbər etməyə hazırdı. O mənə Azərbaycana milyardlar gətirmək istədiyini dedi. Şuşa kimi şəhərin komandasının yaradılması üçün hər şeyə hazırdı. Mənə də vaxt lazımdı ki, “Şuşa Qarabağ” adına layiq komanda olsun. Əvvəl yaratdığım komanda, demək olar ki, “İnter”ə, “Qarabağ”a bərabər oyun göstərirdi. İnşallah, qarşıdakı illərdə “Şuşa Qarabağ”ı bərpa edəcəyik”.
ŞAİR ABDULLA
