Paytaxtın Azadlıq prospekti, 123 ünvanında yerləşən, ictimaiyyət arasında daha çox köhnə “Neftçibaza” kimi tanınan idman kompleksinin Cüdo Federasiyasının balansına verilməsi ilə bağlı xəbərlər yaylıb.

Söylənilənlərə inansaq, son günlərə kimi Gənclər və İdman Nazirliyinin (GİN) tabelyində fəaliyyət göstərən Olimpiya Növləri üzrə Milli Komandalar üçün Təlim-Məşq Mərkəzi bundan sonra cüdoçuların ixtiyarında olacaq.

Məsələ ilə bağlı təlim-məşq mərkəzinin rəhbəri Oqtay Abdullayevlə danışmağı lazım bildik. Oqtay bəy yayılan xəbərlərin qismən düzgün olduğunu təsdiqlədi: “Baza Cüdo Federasiyasına icarə əsasında verilib. Bu ilk dəfə deyil ki... Əvvəl də təlim-məşq mərkəzindəki zallar cüdoçuların sərəncamında idi. Sadəcə, müqavilə yeniləndi. Anlaşmaya görə, federasiya rəhbərliyi zalları və idmançıların qaldığı binanı təmir edəcək. Ümumiyyətlə, federasiyanın yeni rəhbərliyi ilə xoş münasibətimiz var. Müxtəlif tədbirlərdə federasiyanın prezidenti, nəqliyyat, rabitə və yüksək texnologiyalar naziri Rəşad Nəbiyevlə görüşmüşük. Söhbət zamanı görüləcək işlər barədə fikir mübadiləsi olub”.
Olimpiya Növləri üzrə Milli Komandalar üçün Təlim-Məşq Mərkəzi, yəni el dili desək, köhnə “Neftçibaza” uzun illər AFFA-nın bayrağı altında keçirilən liqaların yarış məkanı olub. Lakin son illərdə bazanın süni örtüklü meydanı keyfiyyətini itirdiyindən azyaşlıların çempionatı başqa idman komplekslərində keçirilir. 2021-in yanvarında baş tutan AFFA-nın Növbəti Konfransından sonra onlayn təşkil olunan mətbuat konfransında bu məsələyə toxunan icraçı vitse-prezident Elxan Məmmədov təlim-məşq mərkəzində örtüyün keyfiyyətini itirməsindən söz açmış, yaxın vaxtlarda problemi aradan qaldırmaq yönündə nazirliklə birgə addım atmaq istədiklərini söyləmişdi. Bir ildən artıq vaxt keçməsinə baxmayaraq, bu yöndə hələ ki yenilik yoxdu. Fürsətdən istifadə edib Abdullayevlə söhbətdə bu məsələyə də toxunduq. Mərkəzin rəhbəri yaxın vaxtlarda örtüyün dəyişdirilməsinə start veriləcəyini bildirdi: