KUBOK
178
20.04.2022, 22:10
"Limit götürülməlidi" - Samir Abasov
Azərbaycan kubokunun yarımfinalında "Zirə" "Neftçi" ilə heç-heçə etdi.
Oyundan sonra "ağ-qaralar"ın baş məşqçisi Samir Abasov görüş haqda fikirlərini səsləndirdikdən jurnalistlərin suallarını cavablandırdı...
"Gərginlik hiss olunurdu. İki komanda da məğlub olmamaq istəyirdi. Ehtiyatlı oynayırdıq. Kubokda ilk oyunlar əsasən bu məcrada keçir. Əsas məsələ uduzmamaq idi. Uşaqlar bunu bacardılar. Şikayət etmək istəmirik, amma neçə oyundu, itkilərlə oynayırıq. Azarkeşlər oyun olmamasından şikayətlənir. Hansı futbolçularla oynadığımıza baxmalıyıq. Çempionatda və kubokda elə məqamdayıq ki, əlimizdə olanlardan istifadə etməliyik. Şərt mübarizə aparmaqdırsa, onu etməliyik. Sağ olsunlar, uşaqlar bunu bacardılar".
- İtkiləriniz hesaba nə dərəcədə təsir etdi?
- İlk matç olduğu üçün düşünürəm ki, itkilərsiz də bu məcrada keçərdi. Amma oyunu dəyişmək baxımından isə problemlə üzləşdik. Müdafiə xəttimizdə Stankoviçin olmaması təsir etdi. Demirəm, digər uşaqlar pis oynadı. Sadəcə, oyunçuların bir-birinə uyğunlaşmaq məsələsi var.
- Ömər Buludovu mərkəz müdafiəçisi kimi qazandıq?
- Bu gün kim heyət qursa, belə edərdi. Bir oyunçu fərqli mövqelərdə inkişaf edirsə, bu, çox yaxşıdır. Ömərin mərkəzdə oynaması məcburiyyət idi. Düşünürəm ki, xüsusən ikinci hissədə ən yaxşılardan idi.
- Klublar Komitəsinin iclasında limit və əvəzetmə məsələləri müzakirə edildi. Sizin fikriniz nədir?
- Mənim xəttimi bilirsiz. Həddən artıq sərt fikirdəyəm. Bu, öz klubumuza da xoş gəlmir. Limit götürülməlidi. Mənim öz arqumentlərim var. Bu, inkişafımıza həddən artıq ziyan edir. Kimlərsə başqa cür düşünə bilər. Əvəzetmə üçün isə 5 yaxşıdı. Bütün ölkələr edirsə, biz niyə etməyək? Qərarı gözləməliyik".
