Kişi voleybolçular arasında Azərbaycan Yüksək Liqasında 2021/22 mövsümünə yekun vurulub.

4 dövrəlik çempionatın sonuncu - 20-ci turunun oyunları bu gün “Murov” voleybol klubunun idman zalında təşkil olunub.

Günün ilk matçı “Neftçi” və “Murov” komandaları arasında olub. Görüşün qalibi tay-breykdə müəyyənləşib. “Murov”u 3:2 (26:24, 25:17, 27:29, 20:25, 15:12) hesabı ilə məğlub edən “Neftçi” çempionatı qələbə ilə başa vurub.

Mövsümün son matçında isə “Sərhədçi” MOİK-lə üz-üzə gəlib. Oyun “Sərhədçi”nin 27:25 hesablı üstünlüyü ilə başlasa da, MOİK sonrakı setlərdə qalib gəlib - 25:12, 25:23, 25:13. Rəqibini 3:1 hesabı ilə məğlub edən Eldar Əliyevin komandası son duelindən 3 xalla ayrılıb.

Beləliklə, “Murov” 42 xalla Yüksək Liqanın çempionu olub. Beş xal az toplayan “Neftçi” gümüş medala sahib çıxıb. MOİK isə 28 xalla “üçlüy”ü qapayıb. 6 xala malik “Sərhədçi” “Ekspress”i set fərqinə görə qabaqlayaraq dördüncü olub.

İlk “üçlük”də yer alan klublara medal və diplomlar aprelin 23-də “Sərhədçi” İdman Olimpiya Mərkəzində təşkil olunacaq mövsümünün bağlanış mərasimində təqdim ediləcək.