“Qısa zamanda Azərbaycana qayıtmağı düşünürəm” - AÇIQLAMA
Bir müddətdi ABŞ-da yaşayan gənc məşqçi Etibar İbrahimov Almaniya klubundan təklif alıb.
Mütəxəssis bundan sonra "Ayntraxt"da çalışacaq. O, Almaniya klubunun Asiya ölkəsində, yəni Çində açdığı akademiyada fəaliyyət göstərəcək.
Detalları İbrahimovun özündən öyrəndik: "Bu təklif mənim üçün gözlənilməz oldu. Bir təklif gözləyirdim, amma bunun çox sevdiyim, bağlı olduğum klubdan olacağını bilməzdim. "Ayntraxt" mənim üçün doğma klubdu. Frankfurtda çox yaşamışam. Həm Azərbaycan, həm də Hindistan millisiylə, eləcə də bir çox tədbirlər zamanı burda olmuşam. PRO kateqoriyamın praktikasını "Ayntraxt"da keçmişəm. Ona görə mənim üçün doğma klubdu. Onların möhtəşəm azarkeş qrupu var. "Deutsche Bank Park"da olanda insan biranlıq hər şeyi unudur. Möhtəşəm aura yaranır. Bu təklifi mənə Nikolay Adam etdi. Hazırda ABŞ-dayam. Qısa zamanda Azərbaycana qayıtmağı düşünürəm. Çünki Almaniya və Çin üçün viza işlərini həll etməliyəm. Daha sonra Almaniyaya yollanacam. Orda müqavilə bağlanılacaq. Şərtlər artıq razılaşdırılıb, “1+2” illik sözləşmədi. Bir ildən sonra hər iki tərəf razı qalsa, iki il də çalışacam. Orda qaldığım müddətdə "Ayntraxt" tərəfindən müxtəlif tapşırıqlar olacaq. Məndən başqa orda iki alman məşqçi də çalışır".
Qeyd edək ki, Etibar İbrahimov vaxtilə U-17 və U-19 millimizdə, həmçinin Hindistan yığmasında çalışıb.
GÜNAY VƏLİYEVA
Digər xəbərlər
