Dünən Polşa çempionatında 28-ci turun mərkəzi oyununda ''Lex'' ''Legiya''nı qəbul etdi.

1:1 hesabı ilə başa çatan matçdan sonra ''Lex'' liderliyi özünə qaytardı. Amma görüşdə ən diqqətçəkən məqam tribunalarda fanatların yaratdığı performans oldu. Belə ki, oyunun gedişində tribunada nəhəng bir banner açıldı. Onun üzərində Rusiya prezidenti Vladimir Putinin şəkli əks olunmuşdu. Özü də Putin gözüyumulu şəkildə və boğazından kəndir bağlanmış vəziyyətdə təsvir olunmuşdu! Başqa sözlə desək, polşalı fanatlar Rusiya prezidentini tribunada ''asdılar''. Bundan başqa Putinin ''Spartak''ın formasında əks edilməsi də diqqət çəkən məqamlardan olub. Bu, polşalıların Ukraynaya ilk dəstəyi deyil. Martın 29-da Polşa ilə İsveç arasında keçirilən DÇ-2022-nin seçmə mərhələsinin həlledici pley-offunda polşalı fanatlar tribunada rusiyalı xanımları təhqir edərək ''Ruska kurwa'' şüarını səsləndirmişdilər. Bundan bir neçə gün sonra isə Rusiyanın ''Matç TV'' kanalının əməkdaşı Anton Anisimov polşalılara DÇ-də uğursuzluq arzulayaraq onları ''alçaqlar'' adlandırmışdı.