"Səfərlərin bizi yoracağına inanmıram" - Samir Abasov
"Neftçi"nin baş məşqçisi Samir Abasov premyer-liqanın 22-ci turunda qarşılaşacaqları “Şamaxı” ilə oyun haqda danışıb.
44 yaşlı mütəxəssis klubun rəsmi kanalına açıqlamasında onu bir neçə məsələnin narahat etdiyini bildirib: "Son oyundakı bəhanələr yaşanmasın deyə, növbəti qarşılaşmaya tam fərqli, tam ciddi hazırlaşırıq. Bunlardan biri bəzi oyunçuların zədələri ilə bağlıdı. Onların matça hazır olub-olmayacağı sual altındadı. Nikbinik və motivasiyamız da yaxşıdı. Uzun fasilədən sonra "Zirə" ilə birinci oyuna çıxdıq. Nəticəni kənara qoysaq, oyun bizim üçün ürəkaçan olmadı. Bunları kənara qoysaq, hər şey şey yaxşıdı. Mövsümün son dövrəsində xal itkiləri "Neftçi"yə baha başa gələ bilər. Bunları anlayırıq. Oyunçuların özləri də başa düşürlər ki, belə oyunla irəli getmək və nəyəsə ümid etmək olmaz.
İsrafilovun mövqeyində bir neçə gənc oyunçunu sınamışam, lakin hələ qəti qərar verməmişəm. Müxtəlif fikirlərimiz var. Kim hazır olsa, ona da şans verəcəyik".
"Neftçi" "Zirə" ilə Azərbaycan Kubokunun yarımfinalında da üz-üzə gələcək. "Ağ-qaralar"ın baş məşqçisinin fikrincə, çempionat və kubok oyunları fərqli olacaq:
"Zirə" ilə çempionatda necə oynamışıqsa, bu, o demək deyil ki, ölkə kubokunda da elə çıxış edəcəyik. Nəticə bundan pis və daha yaxşı ola bilər. Əsas oyunçularımız sıradan çıxmasa, hər şey yaxşı olacaq".
Şamaxıya futbolun qayıtmasını çox gözəl hadisə kimi dəyərləndirən Abasov eyniadlı komandanın ilk oyununu məhz "Neftçi"yə qarşı keçirəcəyini fəxrlə vurğulayıb:
"Eşitdiyimə görə, oyundan əvvəl də tədbirlər olacaq. Biz bundan sonra səfər oyunlarına alışmalıyıq. "Bakcell Arena" renovasiya ilə əlaqədar tezliklə bağlanacaq. Nəticədə oyunlarımızı bir müddət səfərdə keçirəcəyik. Bizim üçün necə çətindisə, "Şamaxı" üçün də elədi. Onlar da bir gün əvvəl Şamaxıya gedəcəklər. Sanki ikimiz də səfərə gedirik və neytral meydanda oynayacağıq. Ən yaxşısı nədisə, onu edib qayıtmağa çalışacağıq. Səfərlərin bizi yoracağına inanmıram. Ötən il də də belə halları yaşamışdıq".
Qeyd edək ki, aprelin 9-da Şamaxı şəhər stadionunda keçiriləcək oyun saat 14.00-da başlanacaq.
Digər xəbərlər
