İngiltərə çempionatında ''Mançester Siti'' ilə amansız çempionluq mübarizəsi aparan ''Liverpul'' yeni mövsüm üçün transfer çalışmalarını davam etdirir.

Yayda Takumi Minamino və Divok Orici ilə yollarını ayırmağı planlaşdıran mersisaydlılar hücumçu axtarışındadı. İngiltərə mətbuatının yazdığına inansaq, ''qırmızılar''ın əsas hədəfi Darvin Nunyesdi. ''Benfika''nın gənc ulduzu bu mövsüm 39 rəsmi oyunda 33 qol, 4 məhsuldar ötürməlik performans sərgiləyib. Amma Nunyesin dəyərinin 70 milyon avro olması və ona başqa nəhənglərin də maraq göstərməsi üzündən ''Liverpul'' digər variantları da nəzərdən keçirir. İngilislərin yazdığına görə Yürgen Kloppun komandasının diqqətdə saxladığı forvardlardan biri Enes Ünaldı. ''Xetafe'' və Türkiyə yığmasının üzvünün pressinqdə fəal iştirak etməsi, sürəti, son zərbələrdəki dəqiqliyi və hava mübarizələrində uğurlu oynaması üzündən Kloppun sisteminə uyğun gəldiyi vurğulanılır. 24 yaşlı futbolçu bu mövsüm öz oyunu ilə diqqət çəkməyi bacarır. Enes hazırda La Liqanın bombardirlər cədvəlində 15 qolla Kərim Benzemadan sonra ikinci pillədə qərarlaşıb. Onun ''Xetafe'' ilə 2025-ci ilə qədər müqaviləsi var.

Qeyd edək ki, ''Bursaspor''un yetirməsi olan istedadlı futbolçu 2015-ci ildə ''Mançester Siti''yə transfer olunmuşdu. Amma bu komandada debüt etməmiş ''Genk'', ''Breda'', ''Tvente''də icarə əsasında çıxış etmişdi. 2018-dən İspaniya çempionatında oynayan Ünal ''Xetafe''dən öncə ''Vilyarreal'', ''Levante'' və ''Valyadolid''in şərəfini qoruyub.