Dünən Türkiyənin basketbol üzrə çempionatının 1/4 finalının ilk oyunu çərçivəsində ''Qalatasaray'' ''Baxçaşəhər Koleci''ni qəbul edib.

"Football-plus.az" xəbər verir ki, ''Sinan Ərdəm'' idman salonunda keçirilən oyunda güclü azarkeş dəstəyinə malik olan ''Qalatasaray'' rəqibini 91:70 hesabı ilə yenərək seriyada 1:0 önə keçib. Tribunada ''Qalatasaray'' camiəsinə yaxın olan bir sıra ünlü simalara rast gəlinib. Sabiq başqa Dursun Özbək, prezidentliyə namizədlər Mətin Öztürklə Əşrəf Hamamcıoğlu, hazırda heç bir klubu çalışdırmayan Okan Buruk, eləcə də komandanın kapitanı Arda Turan və müdafiəçisi Patrik van Anholt da tribunada ''Qalatasaray''a dəstək verib.

Oyunu izləməyə ailəsi ilə birlikdə gələn Van Anholt üzücü bir olayla qarşılaşıb. Belə ki, tribunadan atılan bir yad cisim düz onun uşağına dəyib. Bu anda niderlandlı futbolçu əsəbləşərək yerindən qalxıb və tribunalara öz etirazını bildirib. Arda Turanın araya girməsi ilə gərginlik azalıb. Belə ki, Arda komanda yoldaşını sakitləşdirməyi bacarıb.